Mae prif weithredwr Travelodge, Jo Boydell, wedi ymddiswyddo wrth i’r grŵp barhau i ailwampio ei fesurau diogelwch ar ôl ymosodiad rhywiol yn un o westai’r gadwyn.

Daw wedi i ymwelydd mewn Travelodge ym Maidenhead, Berkshire, ddioddef ymosodiad rhywiol gan ddyn a oedd wedi cael cerdyn allwedd i’w hystafell.

Cafodd Kyran Smith ei garcharu am saith mlynedd a hanner ym mis Chwefror ar ôl yr ymosodiad ym mis Rhagfyr 2022.

Cafodd Jo Boydell ei beirniadu’n hallt am y ffordd y gwnaeth ymdrin â’r digwyddiad a phryderon am ddiogelwch ar draws y gadwyn westai.

Fe wnaeth y cyn-brif weinidog, Syr Keir Starmer, ymyrryd yn gynharach eleni a’i hannog i “ymgysylltu o ddifrif” â’r Llywodraeth ynghylch y mater ar ôl iddi ganslo cyfarfod ag ASau.

Dywedodd y cwmni fod Ms Boydell yn gadael ar ôl 13 mlynedd gyda’r grŵp. Bydd y prif swyddog ariannol, Ray Reidy, yn cymryd ei lle dros dro wrth i’r cwmni chwilio am olynydd parhaol.

Dywedodd Mr Reidy: “Rydym yn parhau i ganolbwyntio ar ddiogelwch a lles ein gwesteion a byddwn yn parhau i gymryd y camau angenrheidiol i gryfhau’r busnes.

“Byddwn hefyd yn parhau i ymgysylltu’n rhagweithiol ac yn adeiladol â’r Llywodraeth a’r diwydiant lletygarwch ehangach ynghylch diogelwch a gwarchodaeth.”