Mae Dug a Duges Sussex yn bwriadu symud yn ôl i Brydain, fwy na chwe blynedd ar ôl iddynt symud i America.

Bydd y cwpl yn dychwelyd i’r DU yn ddiweddarach y mis hwn, gan ymgartrefu mewn cartref y tu allan i Lundain.

Dywedodd y Telegraph a’r Sun, a dorrodd y stori nos Fercher, y bydd Archie, saith oed, a Lili, pump oed, yn dechrau mewn ysgolion newydd yn y DU ym mis Medi.

Mae’n debyg na fydd unrhyw newid i rôl a statws Harry a Meghan fel unigolion preifat ac ni fyddant yn dechrau gweithio eto i’r teulu brenhinol.

Bydd y Sussexiaid yn cadw eu cartrefi ym Montecito, California, ac ym Mhortiwgal, tra bydd y Dduges yn parhau i redeg ei brand ffordd o fyw, As Ever, o’u cartref newydd.

Cafodd y Brenin Charles wybod am y tro cyntaf ddydd Sul, dim ond tridiau cyn i’r newyddion ddod yn gyhoeddus.

Ond mae’n debyg ei fod yn croesawu’r cyfle i weld mwy ar y teulu, meddai PA.

Mae’r darpar Frenin, y Tywysog William, wedi ymddieithrio oddi wrth ei frawd.

Awgrymodd Peter Hunt, cyn-ohebydd brenhinol y BBC, y bydd dychweliad annisgwyl ei frawd yn “cynddeiriogi” Tywysog Cymru.

 “Yn y tymor hir, mae dychweliad y Sussexiaid i’r DU yn agor y drws i’r posibilrwydd o ddau lys brenhinol cystadleuol, un William ac un Harry,” meddai.

“Yn y tymor byr, bydd Harry yn gallu cryfhau’r cymod rhyngddo a’i dad.

“A bydd ei bresenoldeb yn ôl adref yn ei gwneud yn anoddach i’w frawd osgoi cymodi.

“Mae’n debygol bod dychweliad annisgwyl Harry a Meghan wedi cynddeiriogi William.”

Fe wnaeth arolwg YouGov y mis diwethaf awgrymu mai dim ond 22% o Brydeinwyr sy’n gweld Meghan mewn goleuni cadarnhaol, o’i gymharu â 65% sydd â barn anffafriol am y cyn-actores. 

Mae 33% yn gweld Harry mewn goleuni cadarnhaol a 58% mewn goleuni negyddol.

Fe wnaeth Harry a Meghan briodi yng Nghapel San Siôr, Castell Windsor, ym mis Mai 2018.

Ond ym mis Mawrth 2019, cyhoeddodd Palas Buckingham y byddai Harry a Meghan yn sefydlu eu cartref eu hunain.

Ym mis Ionawr 2020, cyhoeddodd y Dug a’r Dduges eu bod yn bwriadu rhoi’r gorau i’w rolau fel aelodau o’r teulu brenhinol, a rhannu eu hamser rhwng y DU a Gogledd America.

Penderfynodd y ddiweddar Frenhines Elizabeth II yn Uwchgynhadledd Sandringham, a gafodd ei chynnull i ddatrys yr argyfwng, na allai’r cwpl fod hanner i mewn a hanner allan o’r Teulu Brenhinol.

Erbyn mis Mawrth 2020, roeddent wedi sefydlu cartref parhaol yng Nghalifornia, wedi rhoi’r gorau’n swyddogol i’w rolau fel uwch-aelodau o’r teulu brenhinol ac wedi rhoi’r gorau i ddefnyddio eu teitlau HRH.

Daw’r cyhoeddiad annisgwyl lai na dau fis ar ôl i’r Dug geisio dod o hyd i ffordd o ddod â’i wraig a’i blant yn ddiogel i’r DU i nodi bod blwyddyn ar ôl tan Gemau Invictus yn Birmingham.

Nid yw llefarydd ar ran y Dug a’r Dduges wedi gwneud sylw eto.