Mae disgwyl i Brif Weinidog Cymru rybuddio y bydd cyllideb Llywodraeth Cymru y flwyddyn nesaf yn llai mewn termau real na’r flwyddyn hon.

Mewn cynhadledd i’r wasg fore Mercher, bydd Rhun ap Iorwerth yn addo na fydd y pwysau ariannol “yn lleihau uchelgais y weinyddiaeth newydd hon i wella canlyniadau i bobl Cymru”.

Bydd yn dweud bod yr achos dros gael cyllid tecach gan San Steffan “yn fwy o fater brys fyth” oherwydd yr heriau ariannol.

Mae disgwyl iddo gyflwyno’r ddadl yn uniongyrchol i Brif Weinidog y DU, Andy Burnham, pan fydd y ddau yn cyfarfod ym mis Hydref.

Yn ei araith gyntaf yn Nhŷ’r Cyffredin fel Prif Weinidog ddydd Mawrth, dywedodd Mr Burnham fod grym gwleidyddol wedi’i ganoli yn San Steffan am gyfnod rhy hir.

Addawodd gynnig ffurfiau pellach o ddatganoli lleol i Gymru, yr Alban a Gogledd Iwerddon. Bydd y cynigion yn cael eu trafod mewn cyfarfod arbennig o’r Cyngor Economaidd Cenedlaethol fis nesaf.

Daw sylwadau Rhun ap Iorwerth wrth i Lywodraeth Cymru gyhoeddi adroddiad ar ei 100 niwrnod cyntaf.

Yn ôl yr adroddiad, mae’r gweithgareddau cychwynnol a gynlluniwyd mewn perthynas â phob un o 96 ymrwymiad y llywodraeth wedi’u cwblhau.

Mae disgwyl i'r Prif Weinidog ddweud: “Rwy’n falch bod fy llywodraeth wedi cadw ei haddewid i bobl Cymru.

“Yn ein 100 diwrnod cyntaf, rydyn ni wedi bwrw ati heb oedi, gan osod y sylfeini ar gyfer newid a fydd yn arwain at ganlyniadau gwell ym mywydau pobl. Dyna beth sydd bwysicaf.

“Bydd y pwyslais ar sicrhau bod Cymru yn symud yn ei blaen yn ystod y cyfnod nesaf hwn. Rydyn ni am ganolbwyntio nawr ar droi camau cynnar yn ganlyniadau parhaol.

“Byddwn ni’n tynnu rhestrau aros i lawr, sicrhau dyfodol mwy cynaliadwy i’n Gwasanaeth Iechyd, helpu teuluoedd gyda chostau byw, creu swyddi da, codi safonau yn ein hysgolion, mynd i’r afael â thlodi plant a sefyll dros ein gwlad.”

Mae disgwyl i’r Prif Weinidog hefyd siarad am lansio Rhaglen Lywodraethu newydd, cynlluniau i gydweithio â Llywodraeth yr Alban a’r Uwchgynhadledd Tanau Gwyllt a Gwydnwch sydd i’w chynnal yn fuan.