Lauren Price yn gwneud hanes fel pencampwraig ddiamheuol y byd
Mae Lauren Price wedi gwneud hanes fel y bocsiwr cyntaf o Gymru i ddal pedwar prif deitl y byd ar yr un pryd.
Fe wnaeth y bocswraig 32 oed o Ystrad Mynach guro Michaela Kotaskova o Tsiecia ar bwyntiau yn yr Utilita Arena yng Nghaerdydd nos Wener.
Roedd pob un o’r tri beirniad yn sgorio’r ornest 100-90 o blaid Price, gan roi pob un o’r deg rownd iddi.
Mae hi bellach yn bencampwraig ddiamheuol y byd ym mhwysau welter, ar ôl ychwanegu gwregys WBO at ei theitlau WBA, WBC ac IBF.
Roedd teitl WBO ar gael wedi i Mikaela Mayer ildio’r gwregys cyn ei gornest nesaf yn erbyn Chantelle Cameron.
Dyma 11eg buddugoliaeth Price mewn 11 gornest broffesiynol.
Roedd Price mewn rheolaeth o’r dechrau, gyda’i chyflymder a’i chyfuniadau o ergydion yn achosi trafferthion i Kotaskova.
Fe wnaeth gwrthdrawiad pennau damweiniol yn y bumed rownd adael toriad ger llygad chwith ei gwrthwynebydd, ond roedd Kotaskova yn gallu parhau tan ddiwedd yr ornest.
“Dw i’n teimlo mor lwcus i fod yn Gymraes,” meddai Price wrth y BBC ar ôl y fuddugoliaeth.
‘Breuddwyd wedi’i gwireddu’
Wrth drafod ei champ, dywedodd Price mai’r cefnogwyr oedd wedi gwneud y noson mor arbennig iddi.
“Roedd yn freuddwyd wedi’i gwireddu, ond y cefnogwyr oedd yn gwneud y gwahaniaeth i mi,” meddai.
Dywedodd fod cerdded i’r cylch a chlywed yr anthem genedlaethol wedi ei llenwi â balchder.
Yn ôl ei hyfforddwr, Rob McCracken, Price yw’r bocswraig orau yn y byd, ac mae’n credu y bydd hi’n parhau i wella.
Cyn troi’n broffesiynol, fe wnaeth Price ennill medal aur yng Ngemau Olympaidd Tokyo yn 2021.
Ym mis Mai 2024, hi oedd y fenyw gyntaf o Gymru i ennill teitl bocsio proffesiynol y byd, drwy guro Jessica McCaskill yng Nghaerdydd.
Fe wnaeth hi ychwanegu teitlau IBF a WBC at ei chasgliad drwy guro Natasha Jonas yn y Royal Albert Hall yn Llundain ym mis Mawrth 2025.
Gornest mewn stadiwm
Mae ei hyrwyddwr, Ben Shalom, yn bwriadu trefnu amddiffyniad arall o’r teitlau ym mis Chwefror, cyn gornest mewn stadiwm ym mis Mai neu fis Mehefin.
Yn ôl Shalom, mae Clwb Pêl-droed Dinas Caerdydd a Chlwb Rygbi Caerdydd wedi dangos diddordeb mewn cynnal gornest yr haf nesaf.
Mae Claressa Shields a Chantelle Cameron ymhlith y gwrthwynebwyr posibl, ond does dim gornest wedi’i chadarnhau.