Jonathan Davies sydd wedi dod yn fuddugol yng nghystadleuaeth Dysgwr y Flwyddyn eleni.  

Cafodd ei anrhydeddu mewn seremoni ar lwyfan y Pafiliwn ddydd Mercher.

 Y tri arall a ddaeth i’r brig oedd, Caroline Jones o Wynedd, Kierion Lloyd o ardal Wrecsam a Paige Morgan o’r UDA.

Cychwynnodd Jonathan, sydd o Lwchwr ger Abertawe, ddysgu Cymraeg er mwyn ailgysylltu â’i dreftadaeth a’i hunaniaeth ar ôl byw yn Llundain. 

Astudiodd Gerddoriaeth yno, gan gwblhau gradd a gradd meistr cyn hyfforddi fel athro drwy gwrs TAR. 

Yn 2020 dechreuodd ddysgu Cymraeg, gan wneud cynnydd cyflym a dod yn siaradwr Cymraeg hyderus. 

Trosglwyddodd ei sgiliau fel athro a chyfathrebwr yn naturiol i’w iaith newydd.

Aeth ymlaen i ddechrau PhD ym maes Ieithyddiaeth ac Addysg drwy gyfrwng y Gymraeg ym Mhrifysgol Caerdydd, gan ganolbwyntio ar hygyrchedd mewn addysg. 

Mae’n hwyluso grŵp dysgwyr ifanc, yn dysgu ysgrifennu creadigol, ac yn sylfaenydd podlediad Ymchwil y Gweilch. 

Mae hefyd yn rhan o dîm sy'n datblygu offeryn dwyieithog i asesu hygyrchedd testun. 

Derbyniodd Jonathan Dlws Dysgwr y Flwyddyn, yn rhoddedig gan Gymdeithas Waldo, a £300, yn rhoddedig gan Geraint a Siân James, Siop Awen Teifi, Aberteifi.  

Derbyniodd y tri arall yn y rownd derfynol £100 yr un.

Beirniaid y gystadleuaeth oedd Karl Davies, Kevin Knox a Miriain Iwerydd.