Mae gyrrwr beic modur wedi marw mewn gwrthdrawiad ger Blaenau Ffestiniog brynhawn Sul.

Dywedodd Heddlu'r Gogledd eu bod yn apelio am dystion yn dilyn y gwrthdrawiad dau gerbyd ar yr A470 am 13.32 ddydd Sul.

Roedd y gwrthdrawiad rhwng beic modur a char ym Mwlch y Gorddinan, rhwng Dolwyddelan yn Sir Conwy a Blaenau Ffestiniog yng Ngwynedd.

Er gwaethaf ymdrechion y gwasanaethau brys, bu farw'r gyrrwr beic modur 58 oed yn y fan a'r lle. 

Mae teulu'r gyrrwr beic modur yn cael eu cefnogi gan swyddogion arbenigol.

Cafodd y ffordd ei chau am sawl awr tra bod y gwasanaethau brys yn ymateb i'r digwyddiad.

Dywedodd y Ditectif Arolygydd Tim Evans, o'r Uned Ymchwilio i Wrthdrawiadau Difrifol, ei fod yn awyddus i glywed gan unrhyw dystion.

"Rwy'n ddiolchgar i aelodau o'r cyhoedd ac i'r holl wasanaethau brys a ymatebodd i'r gwrthdrawiad, ac mae fy meddyliau gyda theulu a ffrindiau'r beiciwr a fu farw'n drasig yn y digwyddiad hwn," meddai.

"Byddem yn hoffi clywed gan unrhyw un a welodd y gwrthdrawiad, neu a allai fod â deunydd CCTV neu gamera dashfwrdd o'r ardal yn y cyfnod yn arwain at amser y gwrthdrawiad."