Mae gwleiddyddion yn America wedi gofyn i’r Arglwydd Peter Mandelson roi tystiolaeth i Gyngres yr Unol Daleithiau ynglŷn â’i berthynas â’r pedoffeil Jeffrey Epstein.

Mae dau aelod Democrataidd o Dŷ’r Cynrychiolwyr wedi danfon llythyr at y cyn-lysgennad Prydain i Washington DC yn gofyn iddo ateb cwestiynau gan Bwyllgor Goruchwylio’r Tŷ fel rhan o’u hymchwiliad i Epstein.

Mae cysylltiadau’r Arglwydd Mandelson ag Epstein wedi arwain at alwadau i Syr Keir Starmer ymddiswyddo fel Prif Weinidog.

Mae beirniaid wedi cwestiynu barn y Prif Weinidog wrth benodi’r arglwydd yn llysgennad yr Unol Daleithiau, sy’n cael ei ystyried fel y swydd fwyaf nodedig mewn diplomyddiaeth Brydeinig.

Dywedodd y llythyr, a lofnodwyd gan y cynrychiolwyr Robert Garcia a Suhas Subramanyam: “Er nad ydych chi bellach yn gwasanaethu fel llysgennad Prydain i’r Unol Daleithiau ac wedi ymddiswyddo o Dŷ’r Arglwyddi, mae’n amlwg bod gennych gysylltiadau cymdeithasol a busnes helaeth â Jeffrey Epstein a’ch bod yn dal gwybodaeth hanfodol ynghylch ein hymchwiliad i weithrediadau Epstein.

“O ystyried yr honiadau erchyll ynghylch ymddygiad Epstein, gofynnwn i chi fod ar gael ar gyfer cyfweliad wedi’i drawsgrifio â staff y Pwyllgor ynghylch troseddau Jeffrey Epstein a’i gyd-gynllwynwyr.”

Dywedodd y llythyr hefyd: “Mae nifer o ddarnau o dystiolaeth wedi dod i’r amlwg yn dangos eich cysylltiadau agos â Jeffrey Epstein dros gyfnod o flynyddoedd lluosog.”

Rhoddwyd dyddiad cau o 27 Chwefror i’r Arglwydd Mandelson ymateb i’r llythyr “oherwydd brys a difrifoldeb y mater hwn”.

Mae cynrychiolwyr yr Arglwydd Mandelson wedi cael cais am sylw.