Mae dyn 27 oed wedi ymddangos yn y llys wedi'i gyhuddo o ladd dyn arall yn Y Fenni yr wythnos diwethaf.

Fe wnaeth Liam Bennett ymddangos o flaen Llys Ynadon Casnewydd ddydd Sadwrn wedi'i gyhuddo o lofruddio Idris Squires.

Cafodd swyddogion o Heddlu Gwent eu galw i hen Ffordd Henffordd, Y Fenni, am tua 06:15 ar 15 Mai ar ôl i ddyn ddioddef anafiadau a oedd yn peryglu ei fywyd. 

Bu farw yn yr ysbyty yn ddiweddarach.

Ddydd Sadwrn, dywedodd cadeirydd y fainc yn y llys, Wayne Crocker y byddai Bennett, o Oak Tree Lane, Gilwern, yn cael ei gadw yn y ddalfa cyn gwrandawiad yn Llys y Goron Caerdydd ddydd Mawrth.

Dywedodd wrth Bennett: “Ni all y llys hwn ddelio â'ch achos.

“Bydd eich achos nawr yn cael ei ohirio a'i anfon i Lys y Goron Caerdydd.”

Ddydd Gwener, dywedodd y Prif Arolygydd Ditectif Ellen Joslyn o Heddlu Gwent: “Hoffem ddiolch i’r gymuned am eu cefnogaeth wrth i ni ymchwilio i amgylchiadau’r farwolaeth drasig hon.

“Rydym yn deall y gall adroddiadau o’r natur hon beri pryder i’n cymunedau.

“Er bod ein hymholiadau’n parhau dros y dyddiau nesaf, mae’n debygol y byddwch yn gweld nifer cynyddol o swyddogion yn yr ardal.”

Mae Heddlu Gwent wedi gofyn i unrhyw un sydd â lluniau camera dangosfwrdd, teledu cylch cyfyng neu gloch drws o Old Hereford Road neu Underhill Crescent a’r ardal gyfagos tua amser y digwyddiad.

Gellir cysylltu â’r heddlu drwy ffonio 101 a dyfynnu cyfeirnod log 2600151351.