Mae dyn o Gaerdydd wedi pledio'n euog i achosi marwolaeth cyd-deithiwr drwy yrru'n beryglus, ac anafu dau arall oedd yn ei gar mewn gwrthdrawiad ar draffordd yr M4 yn Llundain.

Roedd disgwyl i Aadil Sabir, 31 oed, wynebu achos yn yr Old Bailey ddydd Mawrth, yn dilyn y gwrthdrawiad yng Ngorllewin Llundain ar 29 Hydref 2023.

Ddydd Iau, plediodd Mr Sabir yn euog i achosi marwolaeth William Bailey drwy yrru'n beryglus, ac i achosi anafiadau difrifol i Azfur Khan a Hamad Zaman - y tri arall oedd yn ei gerbyd.

Cafodd yr heddlu eu galw am 11:39 ar ddiwrnod y gwrthdrawiad i adroddiadau am gar oedd wedi troi drosodd ar yr M4 yn agos at Gyfnewidfa Parc Cranford.

Daeth y gwasanaethau brys o hyd i bedwar unigolyn ag anafiadau, gyda'r pedwar wedi bod yn teithio yng nghar Mercedes y diffynnydd, yn ôl yr heddlu.

Bu farw Mr Bailey, oedd yn ei ugeiniau, yn y fan a'r lle.

Cafodd dau ddyn arall yn eu hugeiniau eu cludo i'r ysbyty gydag anafiadau difrifol, ac fe gafodd y pedwerydd ei drin yn y fan a'r lle cyn cael ei symud i'r ysbyty.

Plediodd Mr Sabir yn euog drwy gyswllt fideo o Gymru.