Ni fydd adran wartheg yn Sioe Llanilar eleni ar ôl profion TB gyda chanlyniad amhendant ar wartheg sydd ar y ffarm lle mae'r sioe yn cael ei chynnal.

Mewn datganiad dywedodd y pwyllgor bod "nifer fechan" o brofion gyda chanlyniad amhendant ar faes y sioe, sef Cae Sioe Castle Hill.

Dan reolau TB, neu'r diciâu, mae angen i'r anifeiliaid yma gael eu profi eto 60 diwrnod ar ôl y prawf cyntaf.

Mae hynny'n disgyn yn hwyrach na dyddiad y sioe, sef 8 Awst.

Ar hyn o bryd mae profion TB yn orfodol ar gyfer pob fferm wartheg yng Nghymru er mwyn ceisio rheoli'r clefyd.

Er bod modd cynnal profion ar gyfer y sioe, mae'r pwyllgor yn dweud y byddai'n "hynod anghyfrifol" i gynnal y sioe, gan fod gwartheg wedi byw ar faes y sioe eleni.

Ychwanegodd y pwyllgor nad oedd y penderfyniad yn un hawdd, ac yn "diolch i bawb am eu dealltwriaeth".

Roedd Sioe Llanilar yn bwriadu cynnal cystadlaethau ar gyfer sawl brid o wartheg, gan gynnwys holsteins a gwartheg duon Cymreig.

Dywedodd y pwyllgor eu bod yn ystyried posibilrwydd beirniadu'r gwartheg ar y ffermydd lle maen nhw'n cael eu cadw diwrnod cyn y sioe.

Byddai hyn yn cynnwys lluniau a fideos o'r gwartheg yn cael eu dangos yn ystod y sioe.

Cafodd Sioe Llanilar ei chynnal am y tro cyntaf yn 1904.

Mae eu gwefan yn nodi bod dros 1,000 o bobl yn ymweld â'r sioe bob blwyddyn.