Mae cwpl a dderbyniodd ofal gan fydwraig yn ystod genedigaeth gynamserol wedi enwi eu plentyn ar ei ôl fel ffordd o ddiolch iddo.

Mae Shania Jenkins a Liam John yn rhieni i Tobias Michael John.

Cafodd yr enw canol 'Michael' ei ddewis i ddiolch i'r fydwraig o Ysbyty Singleton, Michael Nixon, a helpodd y cwpl drwy gyfnod brawychus iawn.

“Gwnaeth ei garedigrwydd bopeth yn well… am ychydig ddyddiau wedyn, doedden ni ddim hyd yn oed yn gallu dweud enw Michael heb fynd yn emosiynol. A dyna pryd wnaethon ni’r penderfyniad i roi ei enw yn enw Tobi," meddai Shania. 

Mae gan Shania fath prin o ddiabetes, ac roedd yn rhaid iddi gael ei monitro yn ystod ei beichiogrwydd. 

Yn byw ym Mhen-y-bont ar Ogwr ar y pryd, fe aeth i Ysbyty Tywysoges Cymru am sgan arferol cyn cael gwybod y byddai'n rhaid iddi eni'r babi ar ôl 28 wythnos. 

Cafodd ei throsglwyddo i Ysbyty Singleton, lle y cafodd gyffur i leihau'r siawns y byddai'r babi'n cael ei eni mor gynnar.

"Doedden nhw methu dweud yn sicr na fyddai'n dod. Ond fe weithiodd, ac fe arhosodd am chwe wythnos arall," meddai. 

Ym mis Medi y llynedd, bu'n rhaid i Shania roi genedigaeth ar ôl 34 wythnos, ac wedi i Tobi gyrraedd, fe ddechreuodd Shania waedu. 

Fe wnaeth y fydwraig, Michael Nixon, ynghyd â'r cofrestrydd obstetreg Dr Aishvarya Gupta stopio'r gwaedu, gyda Tobi yn cael ei drosglwyddo yn y cyfamser i'r Uned Gofal Dwys Newyddanedig.

Fe arhosodd Michael gyda Shania er mwyn ei monitro. 

"Roedd o’n dda iawn am wybod beth oedd ei angen arna i heb i mi orfod dweud hynny. Roedd o’n gofalu am Liam hefyd. Roedd o mor garedig. Roedd y ffaith fod Michael yno yn gymaint o help," meddai.

Fe benderfynodd y cwpl i ddewis Michael fel enw canol fel ffordd o ddiolch i'r fydwraig. 

Roedd Michael yn ddiolchgar iawn i'r rhieni wedi iddo ddysgu eu bod wedi enwi'r plentyn ar ei ôl. 

"Mae'n rhywbeth na fydda i fyth yn anghofio, a dwi'n ei ystyried o'n fraint," meddai. 

"Mae gwybod bod fy ngofal wedi gwneud gwahaniaeth yn ystod profiad brawychus yn brofiad hynod o arbennig."