Mae pump person arall wedi’u harestio yn rhan o’r ymchwiliad i’r digwyddiadau arweiniodd at wrthdrawiad ar yr A66 a laddodd saith o bobl, gan gynnwys dau heddwas.

Mae’r arestiadau diweddaraf yn dod â chyfanswm y bobl sydd wedi’u harestio yn dilyn y gwrthdrawiad ger Middlesbrough i 17.

Cafodd y cwnstabliaid Matthew Blades, 37 oed, a Tom Clough, 38 oed, eu lladd pan gafodd Volkswagen Passat ei yrru i’r cyfeiriad anghywir ar hyd y ffordd ddeuol cyn taro eu cerbyd yn oriau mân fore Sadwrn.

Bu farw’r pump oedd yn y Passat hefyd.

Dywedodd Heddlu Cleveland ddydd Mawrth eu bod wedi arestio pump arall gyda chymorth yr Asiantaeth Troseddu Cenedlaethol ac Uned Troseddau Cyfundrefnol Ranbarthol y Gogledd-ddwyrain.

Cafodd bachgen 16 oed a dynion 18 a 21 oed eu harestio ar amheuaeth o gymryd rhan mewn grŵp troseddau cyfundrefnol.

Cafodd person 55 oed ei arestio ar amheuaeth o gynorthwyo troseddwr, a pherson 23 oed ei arestio ar amheuaeth o fygwth lladd.

Mae dau o’r 12 o bobl gafodd eu harestio ynghynt bellach wedi ymddangos yn y llys.

Fe wnaeth Kai Beattie, 19 oed, o Foxrush Court, Redcar, ymddangos yn Llys Ynadon Teesside wedi’i gyhuddo o feddu ar ddryll gyda’r bwriad o beryglu bywyd.

Cafodd Cameron George, 26 oed, o Micklow Close, Redcar, ei gadw yn y ddalfa i ymddangos yn Llys y Goron Teesside ar 21 Medi, wedi’i gyhuddo o droseddau cyffuriau a meddu ar eiddo troseddol.

Mae’r heddlu wedi dweud o’r blaen y gallai’r pum dyn ifanc oedd yn y Passat fod â chysylltiadau â “gweithgarwch troseddol difrifol a chyfundrefnol”.

Roedd gan bedwar ohonynt euogfarnau troseddol blaenorol, ac roedd amheuon eu bod yn gysylltiedig â cherbyd arall gafodd ei weld yn taro adeiladau’n fwriadol yn gynharach y bore hwnnw.

Cole Robert Worthy, 17 oed, Theo Rae, 17 oed, Makai Saddington, 18 oed, a Michael Robert Cahill a Jacob Matusiak, y ddau yn 23 oed, oedd y pump fu farw yn y Passat.

Rhifau cofrestru

Dywedodd Heddlu Cleveland eu bod wedi derbyn sawl adroddiad y bore hwnnw am ddau gerbyd yn cael eu gyrru’n beryglus.

Cafodd y cerbyd cyntaf, Volvo XC60, ei weld yn taro adeiladau yn ardal Middlesbrough yn fwriadol.

Mae’r heddlu’n credu bod yr ail gerbyd, y Volkswagen Passat, yn gysylltiedig â gweithgarwch y Volvo.

Roedd rhifau cofrestru’r ddau gerbyd wedi’u clonio, ond cafodd y cerbydau eu gweld gan dechnoleg adnabod rhifau cofrestru awtomatig ANPR.

Mae’r Volvo wedi’i ddarganfod ym Middlesbrough.

Dywedodd Prif Gwnstabl Cynorthwyol Heddlu Cleveland, Wayne Fox: “Mae hwn wedi bod yn ymchwiliad cyflym a chymhleth, gyda chysylltiadau sylweddol â gweithgarwch troseddol difrifol a chyfundrefnol.

“Mae gennym ddyletswydd i ymateb i’r gweithgarwch troseddol difrifol a arweiniodd at y digwyddiad angheuol hwn, ac ymchwilio’n drylwyr iddo, ac i ddod â phawb sy’n gyfrifol o flaen eu gwell.”

Mae mwy na £750,000 wedi’i godi ar gyfer teuluoedd y ddau heddwas. 

Bydd yr arian yn cael ei rannu rhwng y ddau deulu.