Fe fydd Prif Weithredwr Bwrdd Iechyd Prifysgol Betsi Cadwaladr, Carol Shillabeer, yn gadael ei swydd ar ddechrau 2027.

Mae wedi cael ei phenodi'n Brif Weithredwr Ymddiriedolaeth Sefydledig GIG Swydd Gaerhirfryn a De Cumbria, yng ngogledd-orllewin Lloegr.

Ymunodd Ms Shillabeer â Bwrdd Iechyd Betsi Cadwaladr ym mis Mai 2023 fel Prif Weithredwr Dros Dro, yn ystod cyfnod o heriau sylweddol i'r sefydliad.

Roedd hynny'n fuan ar ôl i'r bwrdd iechyd gael ei roi o dan Fesurau Arbennig.

Dywedodd Carol Shillabeer ei bod yn "fraint fawr" gwasanaethu fel Prif Weithredwr Betsi Cadwaladr.

"Rwy'n falch iawn o'r hyn y mae cydweithwyr ledled y sefydliad wedi'i gyflawni yn ystod cyfnod eithriadol o heriol," meddai.

"Rwyf wedi gweld drosof fy hun ymrwymiad ein staff i gleifion, teuluoedd a chymunedau ledled Gogledd Cymru.

"Mae'r cyfle i ddod yn Brif Weithredwr Ymddiriedolaeth Sefydledig GIG Swydd Gaerhirfryn a De Cumbria yn gam nesaf cyffrous i mi yn broffesiynol, ond ni fydd gadael Betsi Cadwaladr a'r nifer o bobl yr wyf wedi gweithio ochr yn ochr â nhw yn hawdd.
 
"Rwy’n ddiolchgar i’r Cadeirydd, y Bwrdd, y Tîm Gweithredol a chydweithwyr ar draws y sefydliad am eu cefnogaeth, eu her adeiladol a’u hymrwymiad dros y tair blynedd a hanner diwethaf."

Dywedodd Cadeirydd y bwrdd iechyd, Dyfed Edwards, ei fod yn dymuno'n dda i Ms Shillabeer yn ei swydd newydd.

"Ymunodd Carol â Betsi Cadwaladr ar adeg hynod o heriol yn hanes y sefydliad ac mae wedi rhoi arweinyddiaeth ymrwymedig a chadarn dros y tair blynedd a hanner diwethaf," meddai.

"Mae llawer o waith eto i'w wneud, ac rydym yn glir iawn bod ein taith wella yn parhau."

Bydd Ms Shillabeer yn ymuno â'i sefydliad newydd yn gynnar yn y flwyddyn newydd, ac yn parhau yn ei swydd bresennol tan hynny.

Ychwanegodd Bwrdd Iechyd Betsi Cadwaladr y bydd yn cadarnhau'r trefniadau arweinyddiaeth dros dro a'r rhai hirdymor maes o law.

Pryderon difrifol

Mae Bwrdd Iechyd Prifysgol Betsi Cadwaladr wedi bod o dan Fesurau Arbennig Llywodraeth Cymru ers mis Chwefror 2023.

Cyhoeddodd y Gweinidog Iechyd ar y pryd, Eluned Morgan, y penderfyniad ar 27 Chwefror 2023, yn dilyn pryderon difrifol am berfformiad, arweinyddiaeth a diwylliant y sefydliad, yn ogystal â'i drefniadau llywodraethu a diogelwch cleifion.

Fel rhan o'r penderfyniad, cytunodd Cadeirydd, Is-gadeirydd ac aelodau annibynnol y bwrdd i gamu o'r neilltu, yn dilyn trafodaethau gyda'r Gweinidog. 

Daeth hynny yn dilyn pryderon am sut roedd y bwrdd iechyd yn cael ei redeg a'r berthynas waith rhwng ei uwch-arweinwyr.

Er bod cynnydd wedi'i wneud o ran cryfhau trefniadau rheoli a llywodraethu, mae heriau sylweddol yn parhau, gan gynnwys amseroedd aros hir am driniaethau wedi'u cynllunio, perfformiad gwasanaethau brys a phwysau ariannol.

Yn ôl y ffigyrau diweddaraf a gyhoeddwyd gan Lywodraeth Cymru, mae Betsi Cadwaladr yn parhau i fod ymhlith y byrddau iechyd â'r perfformiad gwaethaf o ran amseroedd aros mewn adrannau brys a thriniaethau wedi'u cynllunio.

Mae'r sefydliad hefyd yn destun adolygiad annibynnol o'i arweinyddiaeth, ei ddiwylliant sefydliadol, ei strategaeth a'i drefniadau llywodraethu ac atebolrwydd ar hyn o bryd.

Mae'r adolygiad yn cael ei gadeirio gan Dr Kathy McLean, ac mae panel o arweinwyr profiadol y GIG yn ei gynnal.

Dywedodd y Gweinidog Cabinet dros Iechyd a Gofal, Mabon ap Gwynfor, yn y Senedd ddydd Mercher ei fod yn disgwyl cyhoeddi canfyddiadau'r adolygiad cyn bo hir. 

Ychwanegodd y byddai'n gwneud datganiad pellach yn y Senedd ar 24 Tachwedd, ar sail canfyddiadau'r adolygiad.

"Byddwn yn gwneud penderfyniadau ar y camau nesaf ar gyfer Betsi Cadwaladr yn dilyn hynny," meddai ar y pryd.

Mae Betsi Cadwaladr yn gwasanaethu tua 697,000 o bobl ar draws gogledd Cymru.