Mae'r cwmni cyfryngau cymdeithasol sy'n berchen ar Facebook ac Instagram wedi cael dirwy o $567 miliwn mewn dyfarniad hanesyddol dros ddiogelwch plant yn America.

Mae barnwr yn yr Unol Daleithiau wedi gorchymyn i Meta dalu $567m (£421m) am fethu â rhybuddio’r cyhoedd yn ddigonol am y peryglon y gallai eu platfformau eu hachosi i blant.

Dyma’r gosb ariannol fwyaf hyd yma ac fe ddaeth y dyfarniad mewn llys yn nhalaith New Mexico, yn dilyn honiadau bod Meta wedi methu â chymryd camau digonol i ddiogelu defnyddwyr ifanc rhag niwed.

Dywedodd y barnwr y byddai’n rhaid i’r cwmni roi’r arian mewn cronfa fyddai’n cael ei defnyddio i geisio lleihau’r niwed sy’n gysylltiedig â chyfryngau cymdeithasol.

Mae Meta, sydd dan arweiniad y biliwnydd Mark Zuckerberg, wedi wynebu pwysau cynyddol yn yr Unol Daleithiau ac mewn gwledydd eraill dros y ffordd mae eu platfformau’n cael eu defnyddio gan blant a phobl ifanc.

Mae pryderon wedi’u codi ers blynyddoedd ynghylch effaith cyfryngau cymdeithasol ar iechyd meddwl pobl ifanc, yn ogystal â’r posibilrwydd y gallai plant ddod ar draws cynnwys niweidiol neu’n cael eu targedu gan unigolion ar-lein.

Mae’r cwmni wedi cyflwyno nifer o fesurau diogelwch dros y blynyddoedd diwethaf, gan gynnwys mwy o reolaethau ar gyfrifon pobl ifanc a chyfyngiadau ar y math o gynnwys sy’n cael ei argymell iddynt.

Ond mae achosion cyfreithiol yn erbyn Meta yn parhau, gyda’r cwmni’n wynebu honiadau ei fod wedi gwybod am rai o’r risgiau i blant heb weithredu’n ddigon cyflym i fynd i’r afael â nhw.

Mewn ymateb, dywedodd Meta ei fod yn bwriadu herio'r dyfarniad.