Hofrennydd y Llynges mewn damwain yn Nyfnaint
Mae un o hofrenyddion y Llynges Frenhinol wedi bod mewn damwain mewn cae yn sir Dyfnaint yn Lloegr.
Mae'r gwasanaethau brys ar safle'r digwyddiad yn Sourton Down yng ngorllewin y sir, meddai llefarydd ar ran yr heddlu lleol.
Dywedodd llefarydd ar ran y Llynges Frenhinol fod y ddamwain wedi digwydd ychydig cyn 04.00 fore Mercher.
Ni wnaeth y llefarydd roi unrhyw fanylion pellach, gan ychwanegu: "Mae ymchwiliad ar y gweill a byddai'n amhriodol gwneud sylwadau pellach ar hyn o bryd."
Mae nifer o ffyrdd ar gau o amgylch ardal Sourton Cross ar yr A386 a'r A30 ar hyn o bryd.
Mae'r ardal rhwng canolfannau awyr y Llynges Frenhinol yn Yeovilton yng Ngwlad yr Haf a Culdrose yng Nghernyw.
Mae lleoliad y ddamwain yn agos at wersyll Okehampton, cyfleuster milwrol ar gyrion Dartmoor sy'n cael ei ddefnyddio i hyfforddi criwiau hofrennydd.
Yn ystod Cwestiynau’r Prif Weinidog, dywedodd Syr Keir Starmer ei fod yn "ymwybodol o ddamwain hofrennydd y Llynges Frenhinol y bore yma yn Nyfnaint".
"Bydd hwn yn gyfnod pryderus iawn i’r teuluoedd a bydd rhagor o wybodaeth yn cael ei chyhoeddi cyn gynted â phosib," meddai.
