Mae gweithiwr meithrinfa yn Abergele, Sir Conwy, wedi cael ei dedfrydu ar ôl gyrru i'r gwaith pan oedd wedi meddwi.

Fe wnaeth Ilona Robinson, 35 oed, yrru i mewn i ddwy ffens wahanol ar ei ffordd i'r gwaith.

Clywodd y llys yn Llandudno fod ei phrawf alcohol wrth ochr y ffordd wedi mesur 165, o’i gymharu â’r terfyn cyfreithlon o 35 meicrogram o alcohol ymhob 100 mililitr o anadl.

Dywedodd Siriol Jones ar ran yr erlyniad nad oedd Robinson yn gallu sefyll yn syth ar ôl camu allan o'i char yn y feithrinfa ar 30 Mawrth.

Gwrthododd roi allweddi’r car i reolwr y feithrinfa ac roedd "arogl amlwg o alcohol" arni.

Ychwanegodd nad oedd Robinson yn ymwybodol ei bod wedi gyrru i mewn i ffens.

Cafodd yr heddlu eu galw i'r feithrinfa wedi i Robinson yrru i mewn i ail ffens ac achosi difrod i ddau banel.

Dywedodd Andrew Hutchinson ar ran y diffynnydd fod Robinson wedi bod yn yfed ers oriau mân y bore.

Fe wnaeth y barnwr osod gorchymyn cymunedol 18 mis ar y diffynnydd, gyda gweithgareddau adfer i roi cymorth gyda'i "phroblem" yfed.

Bydd angen iddi hefyd gwblhau 220 awr o waith di-dâl ac mae wedi ei gwahardd rhag gyrru am dair blynedd.

Fe fydd angen iddi dalu costau o £199 yn ogystal.