"Rydym yn cymryd pob adroddiad am droseddau sy’n gysylltiedig â chasineb, gan gynnwys y rhai sy’n targedu cymunedau neu hunaniaethau cenedlaethol, o ddifrif. Nid oes lle i ymddygiad o’r fath yn ein cymuned, ac ni fydd yn cael ei oddef dan unrhyw amgylchiadau," meddai.

"Mae ymholiadau ynghylch camerâu teledu cylch cyfyng lleol eisoes ar y gweill, ac mae mwy o batrolau’n cael eu cynnal yn yr ardal er mwyn rhoi sicrwydd i’r gymuned a chynorthwyo gyda’r ymchwiliad."

Tensiynau

Ddydd Llun, dywedodd AS Llafur Dwyrain Clwyd, Becky Gittins, fod y Swyddfa Gartref wedi cytuno i leihau maint ei chynlluniau ar gyfer y safle, yn dilyn ymweliadau â’r pentref.

"Y cynllun gwreiddiol oedd defnyddio 13 o’r 15 eiddo," meddai.

"O’r cychwyn cyntaf, roeddwn yn glir, er y dylai ein hardal chwarae ei rhan wrth ddarparu llety i geiswyr lloches, nad oedd maint y cynllun yn gymesur â phentref maint Gronant, sydd â thrafnidiaeth gyhoeddus gyfyngedig a mynediad cyfyngedig at siopau a gwasanaethau.

"Gofynnais i’r Swyddfa Gartref ailystyried ei dull gweithredu a dadleuais y dylid edrych eto ar y sefyllfa ym mhentref Gronant. 

"Mewn ymateb, gweithredodd swyddogion yn gyflym i ymweld â’r pentref, gweld yr eiddo ac asesu’r sefyllfa drostynt eu hunain. Ar ôl gwneud hynny, maent wedi cytuno i newid eu dull gweithredu’n sylweddol."

Ychwanegodd y byddai'r llety ar gyfer teuluoedd yn unig yn hytrach nag unigolion.

"Nid oes neb yn cael llety ar y safle ar hyn o bryd. Os caiff ei ddefnyddio fel llety i geiswyr lloches yn y dyfodol, bydd uchafswm o dri eiddo’n cael eu defnyddio, gan letya dim mwy na thri theulu," meddai.

"Ni fydd yr adeiladau sy’n weddill yn cael eu defnyddio fel llety i geiswyr lloches.

"Rwyf hefyd am fod yn gwbl glir mai ar gyfer teuluoedd yn unig y mae’r safle wedi’i ddynodi. 

"Ni fydd yn cael ei ddefnyddio i letya dynion sengl nac unrhyw grŵp arall. Mae hyn yn newid sylweddol o’r cynllun gwreiddiol, ac rwy'n credu ei fod yn sefyllfa llawer mwy synhwyrol a phriodol i Gronant.

"Mae’r mwyafrif llethol o drigolion lleol wedi mynegi eu pryderon mewn ffordd resymol ac adeiladol. Yn anffodus, rydym hefyd wedi gweld bygythiadau, brawychu ac ymdrechion i gynyddu tensiynau, gyda llawer o hyn yn ymwneud â phobl nad ydynt o Gronant na’r ardal leol. 

"Nid yw’r ymddygiad hwnnw wedi chwarae unrhyw ran yn arwain at y sefyllfa hon ac nid oes lle iddo yn ein cymuned."