Mae criwiau tân wedi gadael safle digwyddiad ym Mynydd Mechell ger Amlwch ar Ynys Môn.

Dywedodd Gwasanaeth Tân ac Achub Gogledd Cymru fod y tân wedi’i ddwyn dan reolaeth cyn i’r criwiau adael y safle am tua 01:30 fore Gwener.

Roedd y gwasanaethau brys wedi galw ar bobl i gadw draw o’r pentref yn hwyr nos Iau wrth i’r criwiau ddelio â’r digwyddiad.

Cyhoeddodd y gwasanaeth tân neges ar y cyfryngau cymdeithasol ychydig cyn hanner nos yn galw ar bobl i osgoi ardal Mynydd Mechell.

“Cadwch draw o’r ardal tra byddwn yn delio gyda’r digwyddiad os gwelwch yn dda,” meddai llefarydd ar y pryd.

Roedd Heddlu Gogledd Cymru hefyd wedi galw ar bobl i osgoi’r ardal tan hysbysiad pellach.

Nid oes rhagor o wybodaeth am union natur y digwyddiad ar hyn o bryd.