Mae dyn wedi cael ei achub o glogwyn yn Sir Benfro ar ôl iddo gael ei ddal gan y llanw.

Cafodd bad achub pob tywydd RNLI Dinbych-y-pysgod ei alw i Freshwater East am 21:30 nos Fercher ar ôl i Wylwyr y Glannau dderbyn galwad 999 gan y dyn.

Roedd wedi dringo’r clogwyn er mwyn dianc rhag y llanw, ond yna wedi mynd yn sownd.

Aeth y criw gwirfoddol tua saith milltir a hanner i’r gorllewin o Ddinbych-y-pysgod a defnyddio goleuadau chwilio pwerus i ddod o hyd iddo.

Arhosodd y bad achub yn yr ardal nes i hofrennydd achub Gwylwyr y Glannau gyrraedd.

Cafodd y dyn ei godi i ben y clogwyn, lle’r oedd aelodau o dîm achub Gwylwyr y Glannau yn aros amdano.

Dychwelodd y bad achub i’r orsaf am 22:50.