Mae Llywodraeth y Deyrnas Unedig wedi mynnu nad oes "unrhyw amheuaeth" ynglŷn â sofraniaeth Ynysoedd y Falklands.

Daw'r sylw ar ôl adroddiadau y gallai gweinyddiaeth yr Unol Daleithiau ailystyried ei safbwynt ar y diriogaeth yn Ne’r Iwerydd.

Roedd awgrym fod hynny yn cael ei wneud i dalu’r pwyth yn ôl am ddiffyg cefnogaeth Syr Keir Starmer i’r rhyfel yn Iran.

Roedd e-bost mewnol gan y Pentagon yn cynnwys opsiynau i gosbi cynghreiriaid Nato am wrthod ymuno â’r ymdrechion i ailagor Culfor Hormuz.

Mae’r memo yn awgrymu ailasesu cefnogaeth yr Unol Daleithiau i hawl y Deyrnas Unedig dros y Falklands, yn ôl Reuters.

Dywedodd Stryd Downing nad oedd safbwynt y DU ar y Falklands yn mynd i newid.

“Mae Ynysoedd y Falklands wedi pleidleisio o’r blaen o fwyafrif llethol o blaid parhau i fod yn diriogaeth dramor i’r DU.

“Rydym bob amser wedi sefyll dros hawl yr ynyswyr i benderfynu drostyn nhw eu hunain.”

Mae’r Ariannin wedi hawlio sofraniaeth dros Ynysoedd y Falklands, neu'r Malvinas fel maen nhw yn cael eu galw gan y wlad.

Goresgynnodd lluoedd Yr Ariannin yr ynysoedd yn 1982 cyn cael ei threchu yn Rhyfel y Falklands. Bu farw 904 o filwyr yn y rhyfel.

Mae arlywydd yr Unol Daleithiau yn gyfaill i arlywydd presennol Yr Ariannin, Javier Milei, tra bod perthynas Mr Trump â Syr Keir wedi dirywio ers dechrau argyfwng Iran.

Mae’r Prif Weinidog wedi gwrthod rhoi rhwydd hynt i’r Unol Daleithiau ddefnyddio canolfannau milwrol Prydain i gynnal yr ymgyrch fomio yn erbyn Iran.

Dywedodd arweinydd y Torïaid, Kemi Badenoch, fod safbwynt yr Unol Daleithiau yn “nonsens llwyr”.

“Mae angen i ni sicrhau ein bod yn cefnogi’r Falklands. Tiriogaeth Brydeinig ydyn nhw," meddai.

Mae Nigel Farage o Reform UK wedi dweud y bydd yn codi’r mater yn bersonol ag arlywydd Yr Ariannin.

Dywedodd wrth y Press Association: “Does dim ffordd y byddwn ni hyd yn oed yn caniatáu dadl am sofraniaeth Ynysoedd y Falklands.

“Wrth gwrs, bydd y neges honno’n mynd at yr Americanwyr, yn glir. Ond yn yr un modd, rwy’n mynd yn ddiweddarach eleni i gwrdd â’r Arlywydd Milei yn Yr Ariannin a byddaf yn dweud, ‘edrychwch, rydym am gael perthynas wych â’ch gwlad ond does dim modd trafod hyn’.”

Llun: Rhyfel y Falklands yn 1982.