Mae bachgen 13 oed wedi ei gyhuddo o ddau achos o geisio llofruddio wedi i fechgyn eraill ddioddef anafiadau difrifol ar ôl cael eu trywanu mewn ysgol yn Llundain. 

Cafodd dau o fechgyn 12 ac 13 oed eu hanafu wedi’r digwyddiad yn Ysgol Uwchradd Kingsbury yng ngogledd-orllewin Llundain ddydd Mawrth. 

Dywedodd Heddlu’r Met fod y bachgen 13 oed, nad oes modd ei enwi am resymau cyfreithiol, hefyd wedi ei gyhuddo o fod â chyllell ar safle ysgol. 

Cafodd ei gyhuddo o chwistrellu hylif sy’n cael ei ddefnyddio i fynd i’r afael â phryfed mewn wyneb trydydd plentyn yn ogystal. 

Mae disgwyl iddo ymddangos yn Llys Ynadon Ieuenctid Westminster fore ddydd Iau. Y gred yw ei fod yn gyn-ddisgybl yn Ysgol Uwchradd Kingsbury yn Brent. 

Dywedodd Helen Flanagan, o’r adran gwrthderfysgaeth yn Llundain: “Mae’r cyhuddiadau yn erbyn y bachgen ifanc yma yn ddifrifol iawn. 

"Rydym yn parhau i gefnogi’r dioddefwyr a’u teuluoedd, yn ogystal â chymuned ehangach yr ysgol.” 

Dywedodd bod ymchwiliadau’r heddlu yn parhau ar hyn o bryd ac mae disgwyl i fwy o swyddogion yr heddlu fod yn ardal Brent am gyfnod. 

Mae llefarydd ar ran Gwasanaeth Erlyn y Goron wedi cadarnhau fod yna ddigon o dystiolaeth i ddwyn achos cyfreithiol yn erbyn y bachgen. 

Roedden nhw am atgoffa pobl bod ganddo hawl i achos llys teg gan annog unigolion i beidio â rhannu gwybodaeth all effeithio ar hynny. 

Llun: Ben Whitley/PA Wire