Mae dyn o Abertawe wedi cael ei garcharu am oes ar ôl i reithgor ei gael yn euog o lofruddio ei frawd.

Daeth swyddogion o hyd i gorff Martin Steel, 48 oed, mewn tŷ ar Gilgaint Hill View, Y Clas, ychydig ar ôl 10.30 ar ddydd Sadwrn 20 Mai 2023.

Plediodd Darren Steel, 41 oed, o Dreforys, yn ddieuog i lofruddiaeth a dynladdiad Martin ym mis Chwefror 2024.

Cafwyd Steel yn euog gan reithgor ddydd Iau. 

Cafodd ei ddedfrydu i garchar am oes gyda lleiafswm o 20 mlynedd am y llofruddiaeth a'r cyhuddiadau o achosi niwed corfforol a niwed corfforol difrifol.

Dywedodd y Ditectif Arolygydd Stuart Prendiville o Heddlu'r De: "Mae hwn wedi bod yn ymchwiliad hir a chymhleth i ddigwyddiad sydd wedi syfrdanu cymunedau Y Clas, Treforys a chymuned ehangach Abertawe. 

"Mae’r effaith ar y teulu wedi bod yn sylweddol.

"Cyflawnodd Darren Steel y brad eithaf yn erbyn ei frawd hŷn ac achosodd fwy o ofid drwy bledio’n ddieuog a rhoi’r teulu drwy’r profiad o nid un, ond dau achos llys.

"Mae Darren Steel yn unigolyn treisgar a pheryglus ac mae’r ddedfryd o garchar am oes a’r tariff o leiaf o 20 mlynedd yn gwbl gyfiawn yn yr achos hwn.

"Rydym yn falch o’r canlyniad ac yn falch bod yr achos llys bellach wedi dod i ben. Mae ein meddyliau gyda’r teulu."