Mae’r efeilliaid o Grymych, Ioan a Garan Croft, wedi cyhoeddi y byddan nhw’n paffio ar gerdyn Pat Brown a Vasil Ducar ar 3 Ebrill, fydd yn cael ei ddarlledu ar sianel DAZN.

Daw’r newyddion wrth i’r ddau barhau i wneud eu marc yn y gêm broffesiynol ers arwyddo cytundeb gyda Matchroom Boxing, cwmni dan arweiniad yr hyrwyddwr adnabyddus Eddie Hearn.

Ers troi’n broffesiynol, mae Ioan a Garan wedi cynnal record berffaith o 5-0, sydd wedi dal sylw’r byd bocsio. 

Nawr, wrth gyhoeddi eu brwydr nesaf, mae’r ddau’n awyddus i symud ymlaen i’r lefel nesaf.

Wrth sôn am y cam nesaf yn eu gyrfaoedd, mae’r ddau yn edrych ymlaen at herio’i hun ymhellach: “Rydyn ni’n edrych ymlaen at brofi ein hunain ar lwyfan mwy erbyn hyn. Mae pob brwydr yn gam ymlaen, ond nawr mae’n amser cymryd y cam nesaf yn ein gyrfa broffesiynol a dangos ein bod ni’n perthyn ar y lefel uchaf.”

“Mae’r profiad rydyn ni wedi’i ennill hyd yma wedi bod yn amhrisiadwy. Ond rydyn ni’n barod am fwy – barod i wynebu heriau mwy ac i ddatblygu fel bocswyr. Dyna’r nod bob tro: gwella, symud ymlaen a phrofi ein gwerth.”

Yn ôl Matchroom, mae cyffro gwirioneddol ynghylch potensial y ddau frawd o orllewin Cymru, gyda’r cwmni’n credu bod dyfodol disglair o’u blaenau. 

Mae’r tîm hyrwyddo wedi nodi sawl gwaith eu bod yn gweld y ddau fel talentau o’r radd flaenaf sydd â’r gallu i arwain nosweithiau mawr yng Nghymru a thu hwnt.