Fe fydd achos cyfreithiol Arlywydd yr Unol Daleithiau Donald Trump yn erbyn y BBC yn mynd i'r llys ym mis Chwefror 2027 yn ôl dogfennau llys. 

Mae Mr Trump wedi cyflwyno achos cyfreithiol werth $10bn yn erbyn y BBC mewn cysylltiad â’r modd y cafodd araith ganddo ei golygu ar raglen Panorama.

Mae Arlywydd yr Unol Daleithiau yn dweud bod ei enw wedi cael ei ddifenwi.

Fe wnaeth y BBC ymddiheuro i’r Arlywydd am y modd y cafodd y rhaglen ei golygu, ond fe wrthododd y gorfforaeth ei alwadau am iawndal.

Mae tîm cyfreithiol Trump wedi cyhuddo’r BBC o “ffugio ei araith yn fwriadol, mewn modd maleisus a thwyllodrus”.

Mae disgwyl i'r achos llys bara pythefnos ym Miami o 15 Chwefror y flwyddyn nesaf. 

Mae'r BBC wedi cymryd camau cyfreithiol i gael gwared ar yr achos cyfreithiol. 

Mae’r BBC yn honni nad oes gan y llys yn Florida “awdurdodaeth bersonol” dros y gorfforaeth, bod lleoliad y llys yn “amhriodol” a bod Mr Trump wedi “methu â datgan hawliad”, yn ôl dogfennau’r llys.

Mae'r gorfforaeth hefyd yn dadlau na wnaeth greu, gynhyrchu na darlledu y rhaglen ddogfen yn Florida ac nad yw honiad Mr Trump fod y rhaglen ar gael yn UDA yn wir. 

Dywedodd llefarydd ar ran y BBC: "Fel yr ydym wedi’i egluro o’r blaen, byddwn yn amddiffyn yr achos hwn.

“Nid ydym am wneud sylwadau pellach ar achosion cyfreithiol byw.”