Image
Cwpan Dartiau'r Byd: 'Pwysau ar Gymru' yn y gystadleuaeth eleni
Bydd partneriaeth newydd gan Gymru yng Nghwpan Dartiau'r Byd eleni wrth i Jonny Clayton a Nick Kenny gystadlu ar y cyd am y tro cyntaf.
Gerwyn Price a Clayton oedd yn cynrychioli Cymru y llynedd, gyda'r ddau yn cyrraedd y rownd derfynol cyn colli i Ogledd Iwerddon.
Eleni, mae Price wedi dweud "nad yw ar gael" ar gyfer y gystadleuaeth, gan ddweud ei fod eisiau "seibiant" er mwyn "treulio amser gyda'i deulu".
Roedd hynny'n galluogi Kenny o Gwmbrân i allu chwarae dros ei wlad yng nghystadleuaeth dartiau proffesiynol am y tro cyntaf.
Yn y blynyddoedd diwethaf, mae Cymru yn un o'r pedair gwlad uchaf ar y rhestr detholion, gan olygu eu bod yn ymuno â'r gystadleuaeth yn yr ail rownd.
Ond gyda Nick Kenny yn safle 61 ar restr detholion y byd, bydd Cymru yn cychwyn eu hymgyrch yn y grwpiau rhagbrofol.
Lithwania a Gwlad Thai fydd eu gwrthwynebwyr wrth i'r gystadleuaeth gychwyn nos Iau.
Dywedodd Nick Kenny ei fod yn "edrych ymlaen" at gynrychioli ei wlad a chwarae ochr yn ochr â Clayton.
"Dwi methu aros, a dweud y gwir," meddai.
"Roedd gen i syniad bod Gezzy [Gerwyn Price] efallai ddim yn chwarae, ond tan iddo gael ei gyhoeddi gan y PDC [corff llywodraethu'r gamp], doeddwn i ddim eisiau codi fy ngobeithion.
"Ond dwi'n edrych ymlaen at y gystadleuaeth, a dwi'n siŵr y bydd y ddau ohonon ni'n chwarae'n dda gyda'n gilydd."
Mae eleni wedi bod yn flwyddyn dda i Clayton, a enillodd sawl noson yn Uwch Gynghrair y Dartiau, ac mae hefyd wedi cyrraedd y rownd derfynol ar y gylchdaith Ewropeaidd.
Yn bumed ar restr detholion y byd, fe fydd yn gapten Cymru yn ystod y gystadleuaeth eleni.
Fe ddaeth Nick Kenny i'r amlwg yn y byd dartiau ar ôl iddo guro cyn-bencampwr y byd, Raymond van Barneveld, ym Mhencampwriaeth y Byd ym mis Rhagfyr 2024.
Fe enillodd dros 40 o gapiau dros Gymru ar y gylchdaith led-broffesiynol cyn iddo droi'n broffesiynol yn 2019.
Mae'n dweud bod ganddo "esgidiau mawr i'w llenwi" yn absenoldeb Gerwyn Price.
"Mae'r pwysau yno ond dwi'n ffynnu dan bwysau," meddai.
"Mae'r cefnogwyr wrth gwrs wedi'u siomi bod Gezzy ddim yn mynd, ond fi sydd yma a cawn weld beth fydd yn digwydd yn y gêm gyntaf.
"Mae Jonny a minnau eisiau mynd yr holl ffordd, ond mae'n bwysig ein bod ni'n parchu'r grŵp hefyd."
