Mae Downing Street wedi mynnu bod y dyfarniad euog yn erbyn Manchester City yn “ddifrifol”, ar ôl i Andy Burnham gael ei gyhuddo o wneud ymyrraeth “hynod anarferol” i gefnogi perchnogion y clwb pêl-droed.

Fe gyhoeddodd llefarydd ar ran Downing Street ddatganiad ar ôl i’r Prif Weinidog ddweud y byddai’n “bryderus iawn” pe bai’r perchnogion presennol yn gwerthu’r clwb.

Roedd gweinidog chwaraeon cysgodol y Ceidwadwyr, Louie French, wedi cyhuddo Mr Burnham o “gefnogi’r perchnogion yn gyhoeddus” yng nghanol ymchwiliad i gyllid y clwb dros y blynyddoedd diwethaf, gan ddisgrifio ei sylwadau fel rhai “hynod anarferol”.

Ond roedd Liam Gallagher sy’n cefnogi Manchester City i’w weld yn croesawu ymyrraeth Mr Burnham ddydd Mercher, ac wedi ysgrifennu ar X: “There’s only 1 ANDY BURNHAM.”

Cafwyd Manchester City yn euog o gyhuddiadau yn ymwneud â thorri rheolau ariannol rhwng tymhorau 2009-10 a 2017-18.

Dywedodd yr Uwch Gynghrair fod comisiwn annibynnol wedi darganfod bod City wedi trefnu cytundebau masnachol “ffug” gyda nifer o’i noddwyr yn ystod y cyfnod hwnnw. 

Roedd y cytundebau’n rhan o gynllun ariannu ar gudd, lle’r oedd y cwmnïau dan sylw ond yn gorfod talu cyfran o’r ffioedd nawdd perthnasol.

Fe wnaeth y comisiwn ddarganfod bod gweddill yr arian wedi’i ddarparu gan Abu Dhabi United Group Investment & Development Ltd (ADUG) oedd berchen ar y clwb.

Dywedodd Mr Burnham wrth 5 News yn gynharach yr wythnos hon “mai dim ond yn deg” oedd hi i Manchester City a’i gefnogwyr gael y cyfle i barhau i herio’r sefyllfa, os nad oedden nhw'n credu ei bod yn deg.

Dywedodd fod y tîm o dan berchnogaeth Sheikh Mansour bin Zayed Al Nahyan yn wynebu “cyhuddiadau difrifol iawn”.

Wrth siarad â’r BBC fe ddywedodd y Prif Weinidog a arferai fod yn faer i Fanceinion yn flaenorol nad oedd yn “ymwneud yn uniongyrchol â’r broses”.

Pan ofynnwyd iddo a oedd yn poeni y gallai’r perchnogion presennol werthu’r clwb, dywedodd: “Byddwn yn bryderus iawn pe bydden nhw'n gadael.

“Maen nhw wedi chwarae rhan mor enfawr yn y gwaith o adeiladu Manceinion fodern."

Pan ofynnwyd iddo hefyd a fyddai ei gysylltiad â’r clwb yn gallu gwrthsefyll craffu, dywedodd Mr Burnham: “Rwyf mewn gwirionedd yn diolch i City Football Group a’r berchnogaeth ehangach am yr arian nad ydynt wedi’i fuddsoddi yn yr Etihad a’r campws o’i amgylch yn unig, ond hefyd yn y ddinas, ond byddai, wrth gwrs.”

Ddydd Iau, dywedodd llefarydd ar ran Downing Street: “Fel y gwnaeth y Prif Weinidog ddweud yn glir, mae’r dyfarniad cychwynnol yn ddifrifol ac ni all fod unrhyw awgrym bod unrhyw un uwchlaw’r rheolau.

“Pwysleisiodd hefyd fod hon yn broses annibynnol sy’n parhau.

“Mae’n hanfodol caniatáu iddi fynd rhagddi hyd at ei diwedd a pharchu’r canlyniad.

“Lle bynnag y sefydlir bod camwedd wedi digwydd, dylai’r rhai sy’n gyfrifol wynebu’r canlyniadau priodol.”

'Hynod anarferol'

Yn gynharach, dywedodd Mr French: “Mae ymyrraeth Andy Burnham i gefnogi perchnogion Manchester City yn hynod anarferol.

“Mae’r clwb yn wynebu cyhuddiadau digynsail ac mae cefnogwyr wedi’u dychryn gan yr hyn y maent yn ei ddarllen yn y papurau newydd, ac eto mae Burnham yn cefnogi’r perchnogion yn gyhoeddus tra bod yr ymchwiliad yn parhau.

“Bydd cefnogwyr yn gofyn, yn gwbl briodol, a oes pwysau gwleidyddol yn cael ei roi yma a sut mae hynny’n gysylltiedig â’r buddsoddiadau sydd wedi cael cyhoeddusrwydd eang gan y perchnogion ym Manceinion.

“Dylai pêl-droed gael ei lywodraethu’n annibynnol, gyda’r rheolau’n berthnasol i bawb yn gyfartal.

“Mae cefnogwyr yn haeddu hyder nad oes unrhyw glwb na pherchennog uwchlaw’r rheolau hynny.

“Felly, mae sylwadau Burnham yn gwbl allan o gysylltiad â chefnogwyr a’r cyhoedd ehangach.

“Rhaid i’r Llywodraeth gadw gwleidyddiaeth allan o bêl-droed a sicrhau bod comisiwn annibynnol yr Uwch Gynghrair yn gallu gwneud ei waith yn rhydd rhag dylanwad allanol.”