Image
'Siom' fod cofeb LHDT+ i gymeriad teledu yng Nghaerdydd yn cael ei thynnu i lawr
Mae’n “siom” fod cofeb i gymeriad mewn cyfres teledu ym Mae Caerdydd yn cael ei thynnu lawr, yn ôl un sydd wedi bod yn gofalu amdani.
Mae ‘Cofeb Ianto’, neu ‘Ianto’s Shrine’ yn deyrnged i gymeriad o’r gyfres deledu ‘Torchwood’ oedd ar y BBC rhwng 2006 a 2011.
Roedd Ianto yn gymeriad hoyw, ac roedd nifer ar y pryd yn ei weld fel symbol pwysig o gynrychiolaeth LHDT+ ar deledu cenedlaethol yn ystod oriau brig.
Ym Mae Caerdydd oedd y mynediad cudd i sefydliad Torchwood ar y rhaglen.
Ond, ar ôl 17 o flynyddoedd, mae’r gofeb a’r holl addurniadau yn cael eu tynnu i lawr.
Yn ôl llefarydd ar ran Cei'r Fôr-forwyn ym Mae Caerdydd, mae hyn er mwyn gwneud “gwaith cynnal a chadw” yn yr ardal.
'Mwy na' cymeriad'
Mae Carol-Anne Hillman wedi bod yn edrych ar ôl y gofeb a hynny yn wirfoddol am bron i ddegawd.
“Rydw i wedi fy siomi," meddai hi.
Fe ddechreuodd ei diddordeb fel ffan o’r gyfres Torchwood sydd wedi’i ffilmio gerllaw, a bellach mae’n dweud bod cofeb Ianto “yn rhan enfawr o fy mywyd yng Nghaerdydd".
“I nifer mae'n fwy na cymeriad. Dyna’r tro cyntaf i nifer weld perthynas o’r fath ar y teledu.”
Mae Carol-Anne yn ceisio gwarchod yr holl eitemau sydd ar y gofeb er mwyn gallu ail-adeiladu’r gofeb unwaith mae’r gwaith atgyweirio wedi dod i ben.
“Fi ’di gwario cannoedd ar addurniadau am y gofeb,” meddai hi.
Mae’r cyngor wedi cynnig mainc ar y safle er mwyn i Carol-Anne allu rhoi plac i gofio am y sioe.
Yn ôl Cei'r Fôr-forwyn: "Mae angen y gwaith hwn i sicrhau bod y rhodfa isaf yn parhau i ddarparu profiad gwych i'n holl ymwelwyr.”
Yn y gorffennol, fe ddywedodd Gareth David Lloyd, oedd yn chwarae rhan Ianto ei fod yn “syndod i sylweddoli’r effaith ddiwylliannol” yr oedd Ianto a'i berthynas â Jack wedi’i gael.
Fe ddisgrifiodd poblogrwydd y greirfa ym Mae Caerdydd fel peth “gwallgof” ond ei fod yn “falch iawn” o’r cymeriad.
"Rwy'n synnu ei fod wedi sefyll cyhyd - bob blwyddyn rydw i'n meddwl ei fod yn syfrdanol ei fod yno o hyd," meddai wrth Radio Wales.
"Ond hefyd mae'n braf iawn, yn gyffrous iawn, meddwl bod cymeriad y gwnes i gyfrannu at ei greu wedi cael y fath effaith, wedi gwneud cymaint o farc ar bobl."
Image
