Cafodd cyflenwr bwyd ar Stryd Fawr dinas Bangor ei gau ar unwaith gan swyddogion ar ôl i arolygydd weld llygoden fawr fyw.

Roedd ‘Bangor Cash and Carry’ eisoes wedi cael gorchymyn i wella hylendid ar ôl i gyngor roi sgôr o sero iddo, cyn cael ei gau gan swyddogion naw mis yn ddiweddarach.

Clywodd ynadon yng Nghaernarfon, Gwynedd, ddydd Mercher fod camau gorfodi brys wedi’u cymryd oherwydd pla o lygod mawr ar safle'r cyflenwr bwyd sy’n cael ei redeg gan SSB Bangor Ltd ar Stryd Fawr y ddinas yng Ngwynedd.

Roedd baw llygod mawr ac olion cnoi ar ddeunydd pacio wedi’u gweld. Clywodd yr ynadon fod y llygoden fawr wedi rhedeg o dan baledi. 

Dywedodd Jack Evans, a oedd yn erlyn ar ran Cyngor Gwynedd: “Roedd y pla mor eang fel bod yn rhaid ei fod wedi datblygu dros gyfnod sylweddol.”

Dywedodd: “Roedd hwn yn achos difrifol. Roedd pla eang o lygod mawr a llygoden fawr fyw yn yr adeilad.

“Roedd y busnes hwn yn gweithredu fel cyflenwr cyfanwerthu. Roedd y canlyniadau posib yn ymestyn y tu hwnt i’r un safle manwerthu.”

‘Trafferth’

Ychwanegodd Mr Evans fod gwaith gwella wedi’i wneud a bod y gorchymyn gwahardd wedi’i godi.

Fe wnaeth y cwmni gyfaddef chwe throsedd hylendid bwyd ym mis Hydref y llynedd.

Cafodd dirwy o £27,000 ei gosod, ynghyd â chostau o £7,027 a gordal o £2,000. 

Ond cafodd y penderfyniad ei ohirio wedyn ar ôl i’r cyfarwyddwr Saiful Syed ddweud y byddai’n rhaid iddo gau’r busnes.

Dywedodd wrth y llys: “Rwy’n cael trafferth wirioneddol. Mae gwerthiant wedi gostwng.”

Fe gynigiodd dalu’r ddirwy ar gyfradd o £150 y mis. Cafodd orchymyn i gyflwyno cyfrifon y cwmni cyn gwrandawiad arall.

Dywedodd Syed, o Rochdale: “Mae’n wir ddrwg gen i am hyn.”

Dywedodd ei fod bellach wedi newid y cwmni rheoli plâu roedd yn ei ddefnyddio. Roedd ei fusnes yn cyflenwi bwytai a siopau cludfwyd.

Dywedodd cadeirydd yr ynadon fod y cwmni wedi dangos “diystyrwch clir” o gyfreithiau hylendid.