Fe sicrhaodd Cymru eu hail fuddugoliaeth gartref eleni wrth iddyn nhw guro Japan 28 - 21 o flaen torf o 52,000 yn Stadiwm Principality.

Roedd y dechrau perffaith i Gymru ar ôl tri munud wrth i Louis Rees-Zammit ruthro drwy amddiffyn Japan o’i llinell 22 ei hun.

Er gwaethaf amddiffyn arwrol gan Japan ar eu llinell eu hunain, llwyddodd prop Caerfaddon Archie Griffin i dorri drwodd am ei gais rhyngwladol cyntaf o bellter byr.

Fe darodd Japan yn ôl ychydig funudau’n ddiweddarach ar ôl i Gymru gnocio'r bêl ymlaen.

Rhedodd blaenasgellwr Japan, Ben Gunter, i mewn am gais gyda Naoto Saitō yn ychwanegu’r trosiad i ddod â’r sgoriau’n gyfartal ar ôl deg munud.

Fe sgoriodd Cymru eto ar ôl 27 munud wedi i Jac Morgan dorri drwy’r amddiffynfa ar yr ochr chwith a phasio’r bêl i mewn i Louis Rees-Zammit.

Roedd Josh Adams wrth law i orffen y symudiad a chroesi am gais ar ôl i asgellwr Bryste gael ei dynnu i lawr.

Unwaith eto, fe ymatebodd Japan bron yn syth, gyda’r clo Warner Dearns yn croesi rhwng dau aelod o reng flaen Cymru, Dewi Lake a Nicky Smith.

Fe groesodd Louis Rees-Zammit toc cyn hanner amser ar ôl i Eddie James o’r Scarlets gario’r bêl i fyny’r cae a phasio i Blair Murray. 21-14 oedd y sgôr ar yr hanner.

Inline Tweet: https://twitter.com/S4Cchwaraeon/status/2119136236451381606?a=vL4tu3bJpex_F1KSbAU&s=20

Doedd dim pwyntiau drwy gydol chwarter cyntaf yr ail hanner wrth i gamgymeriadau a diffyg disgyblaeth Cymru eu gadael i lawr.

Daeth y pwynt bonws o’r diwedd ar ôl 68 munud wrth i Blair Murray fynd ar garlam i lawr yr ochr chwith o’i linell 22 ei hun, cyn i Josh Adams fynd drosodd am ei ail gais o’r noson.

Ond unwaith eto fe darodd Japan yn ôl yn syth gan sicrhau cais drwy Kenta Fukuda gyda pum munud yn weddill.

Llwyddodd Josh Adams i droi'r bêl drosodd ar ôl yr ail-ddechrau i sicrhau buddugoliaeth i Gymru, a fydd angen gwella yn sylweddol cyn i Seland Newydd ac Awstralia ymweld dros yr wythnosau nesaf.