Mae trydydd person wedi'i arestio ar ôl i'r heddlu ddatgan "digwyddiad difrifol" yn ardal Treforys yn Abertawe nos Wener.

Cafodd dyn 29 oed o Abertawe ei arestio fore Sadwrn ar amheuaeth o affräe (affray) a meddu ar arf ymosodol, ac mae’n parhau yn nalfa’r heddlu.

Daw ei arestiad ar ôl i ddau berson arall gael eu harestio ar ôl y digwyddiad ddydd Gwener.

Cafodd dyn 41 oed o Lansamlet ei arestio ar amheuaeth o feddu ar ddryll gyda'r bwriad o beryglu bywyd, ac fe gafodd bachgen 16 oed, sydd hefyd o Lansamlet, ei arestio ar amheuaeth o affräe.

Mae'r ddau yn parhau yn y ddalfa wrth i'r ymchwiliad troseddol fynd yn ei flaen.

Dywedodd yr heddlu ddydd Gwener fod gan un person fân anafiadau. Ond mae'n ymddangos nad oedd anafiadau’r unigolyn a aeth i’r ysbyty yn gysylltiedig â’r digwyddiad.

Mae ditectifs o Dîm Ymchwilio i Droseddau Mawr Heddlu De Cymru yn parhau i ymchwilio i amgylchiadau’r digwyddiad ac yn apelio ar unrhyw un a welodd beth ddigwyddodd, neu sydd â lluniau camera dangosfwrdd, teledu cylch cyfyng neu ffôn symudol, i gysylltu â nhw.

Dywedodd y Prif Uwcharolygydd Stephen Jones: “Mae ein hymchwiliad, sy’n cynnwys timau o dditectifs a staff arbenigol, yn parhau ac mae ymholiadau sylweddol wedi eu cynnal ers y digwyddiad nos Wener.

“Er bod yr ymchwiliad yn parhau, credwn fod yr unigolion dan sylw yn debygol o fod yn adnabod ei gilydd.

"Mae digwyddiadau o’r fath yn brin, ond rydym yn deall eu bod yn achosi cryn bryder o fewn cymunedau lleol.

"Nid ydym yn ymwybodol ar hyn o bryd o unrhyw fygythiad ehangach i’r cyhoedd.

“Bydd presenoldeb amlwg gan yr heddlu yn parhau yn yr ardal wrth i swyddogion barhau â’u hymholiadau a rhoi sicrwydd i drigolion lleol.

“Hoffwn annog unrhyw un sydd â gwybodaeth i gysylltu â ni.”