Bu'n rhaid iddi gael llawdriniaeth.

Roedd y gantores sy'n hanu o Sgiwen ger Castell-nedd i fod i ganu mewn cyngherddau ar hyd a lled Ewrop yn ddiweddarach eleni i nodi 50 mlynedd ers iddi gyhoeddi ei sengl lwyddiannus gyntaf Lost In France, gydag un cyngerdd wedi ei drefnu yng Nghaerdydd.

Mewn datganiad ar wefan y seren ddydd Llun, mae llefarydd ar ei rhan yn nodi nad yw hi mewn coma bellach, ond ei bod yn dal i fod yn sâl iawn, ac mewn uned gofal dwys mewn ysbyty ym Mhortiwgal. 

"Er bod ei chyflwr yn gwella, mae'n broses araf," meddai'r neges. 

"Mae ei meddygon yn dal i fod yn hyderus y bydd hi'n gwella'n dda, ond mae hynny yn mynd i gymryd amser." 

Mae'r llefarydd wedi diolch i gefnogwyr Bonnie Tyler am eu "cariad a'u cefnogaeth." 

Mae'r datganiad hefyd yn ymddiheuro am y newidiadau i'r amserlen ar gyfer ei chyngherddau yr haf hwn. 

"Rydym yn ymddiheuro i holl gefnogwyr Bonnie ac i'n partneriaid hyrwyddo am y siom y bydd hyn yn ei achosi, ond rydym yn gobeithio y byddwch yn deall, ac yn amyneddgar â ni yn ystod yr amgylchiadau anodd hyn."    

"Rydym yn gobeithio y gwelwn ni chi y flwyddyn nesaf," meddai'r neges. 

Cafodd Bonnie Tyler ei geni yn Gaynor Hopkins yn 1951.

A hithau wedi ei magu gyda chariad at gerddoriaeth, cafodd ei darganfod gan y sgowt Roger Bell mewn clwb yn Abertawe.

Mae hi'n fwyaf adnabyddus am ei chân boblogaidd Total Eclipse Of The Heart yn 1983, a ddaeth yn Rhif 1 yn y siartiau.

Roedd ganddi bedair cân boblogaidd arall yn y deg uchaf, gan gynnwys It’s A Heartache a Holding Out For A Hero.