Mae Peter Mandelson wedi ei arestio ar amheuaeth o gamymddwyn mewn swydd gyhoeddus yn ôl Heddlu'r Met. 

Fe gyhoeddodd Mr Mandelson ddechrau Chwefror ei fod wedi penderfynu gadael Tŷ'r Arglwyddi.

Roedd y pwysau'n cynyddu ar Mandelson yn sgil gwybodaeth newydd a gyhoeddwyd yn yr Unol Daleithiau am ei berthynas â'r troseddwr rhyw, Jeffrey Epstein.  

Mae honiadau fod Peter Mandelson wedi trosglwyddo gwybodaeth sensitif i Epstein, tra roedd e'n weinidog yn Llywodraeth Lafur Gordon Brown. 

Daeth hynny i'r amlwg ar ôl i Adran Gyfiawnder America gyhoeddi mwy na thair miliwn o ddogfennau yn ymwneud ag Epstein.  

Mewn datganiad ddydd Llun, dywedodd Heddlu'r Met fod "swyddogion wedi arestio dyn 72 oed ar amheuaeth o gamymddwyn mewn swydd gyhoeddus.

"Cafodd ei arestio mewn cyfeiriad yn Camden ddydd Llun, 23 Chwefror a'i gludo i orsaf heddlu yn Llundain i gael ei gyfweld. 

"Daw hyn wedi gwarantau chwilio mewn dau gyfeiriad yn ardaloedd Wiltshire a Camden."

Rhagor i ddilyn.