Mae dyn wedi’i arestio ar amheuaeth o lofruddio mewn cysylltiad â marwolaeth mewn pentref ger Wrecsam.

Cafodd ymchwiliad ei lansio ar ddechrau mis Mehefin ar ôl i ddyn 38 oed ddioddef anafiadau difrifol yn dilyn digwyddiad ar Stryd y Farchnad yn Rhosllanerchrugog ychydig cyn hanner nos ddydd Gwener, 5 Mehefin.

Bu farw'r dyn yn yr ysbyty ddydd Mercher, 17 Mehefin.

Roedd dyn lleol 37 oed wedi cael ei arestio ar amheuaeth o achosi niwed corfforol difrifol yn dilyn y digwyddiad.

Ers hynny, mae'r dyn 37 oed hefyd wedi cael ei arestio ar amheuaeth o lofruddiaeth. 

Mae’n parhau i fod dan ofal yr heddlu, lle mae’n cael ei holi gan swyddogion.

Mae teulu’r dyn a fu farw a’r crwner wedi cael gwybod am y datblygiad.

Mae’r Prif Dditectif Arolygydd Eleri Thomas yn parhau i apelio ar unrhyw un sydd â gwybodaeth a allai gynorthwyo’r ymchwiliad i gysylltu â’r heddlu.

"Hoffwn dawelu meddyliau trigolion fod hwn yn ymddangos fel digwyddiad ynysig, ac mae ymchwiliadau helaeth yn parhau er mwyn sefydlu amgylchiadau marwolaeth y dyn," meddai mewn datganiad.

"Rwyf hefyd yn annog pobl i beidio â chyhoeddi unrhyw beth ar-lein a allai ddylanwadu unrhyw achos llys yn y dyfodol neu danseilio’r broses cyfiawnder troseddol.

"Mae fy meddyliau’n parhau gyda’i deulu ar yr adeg anodd hon."