Mae dyn 26 oed o Brydain wedi cael ei arestio ar amheuaeth o lofruddio'r cyn-AS ac ASE Ann Widdecombe.

Dywedodd Prif Gwnstabl Cynorthwyol Heddlu Dyfnaint a Chernyw, Matt Longman, fod y dyn wedi cael ei arestio mewn cyfeiriad yn Newton Abbot yn Nyfnaint ddydd Gwener.

Dywedodd nad oedd yr achos “yn cael ei drin fel terfysgaeth” ac nad oedd “unrhyw wybodaeth” ar hyn o bryd i awgrymu ei fod yn “drosedd â chymhelliant gwleidyddol”.

Roedd yr heddlu wedi lansio ymchwiliad llofruddiaeth i farwolaeth Ann Widdecombe, y cyn-weinidog Ceidwadol a ddaeth yn llefarydd ar ran Reform UK, ddydd Gwener.

Cyhoeddwyd yn gynharach ddydd Gwener fod Widdecombe, a fu’n Aelod Seneddol dros Maidstone yng Nghaint am 23 mlynedd, wedi marw yn 78 oed.

Dywedodd Heddlu Dyfnaint a Chernyw fod swyddogion wedi cael eu galw i gyfeiriad yn Haytor, ger Newton Abbot yn Nyfnaint, am 11.40 fore Iau.

Cafodd Widdecombe, oedd yn byw yn Haytor, ei chanfod yn farw ar ôl dioddef anafiadau difrifol.

Roedd hi wedi ymddangos ar Talk Radio ddydd Mercher.

Dywedodd y Prif Arolygydd Ditectif Ilona Rosson: “Mae hwn yn ddigwyddiad hynod drasig ac mae ein meddyliau gyda theulu a ffrindiau Ann Widdecombe ar yr adeg anodd hon.

“Mae'n ein hymchwiliad i lofruddiaeth yn y camau cychwynol ond yn symud yn gyflym iawn.

“Rydym yn defnyddio’r holl adnoddau angenrheidiol i ganfod yn union beth sydd wedi digwydd ac i ddod o hyd i’r person sy’n gyfrifol, y credwn ei fod yn ddyn gwyn.”

'Ymosodiad cas ac erchyll'

Dywedodd Prif Weinidog y DU, Syr Keir Starmer, ei bod yn bwysig "codi uwchlaw unrhyw wahaniaethau gwleidyddol" a chanolbwyntio ar ddal y llofrudd.

"Rwy’n credu ei bod hi’n bwysig iawn ein bod ni’n codi uwchlaw unrhyw wahaniaethau gwleidyddol - y rhaniad gwleidyddol - ac yn dweud mai’r peth pwysicaf ar hyn o bryd yw bod pob un ohonom yn helpu’r heddlu i adnabod yr unigolyn sy'n cael ei amau a sicrhau ei fod yn cael ei arestio cyn gynted â phosib," meddai.

"Mae’n beryglus yn amlwg, ac rwy’n erfyn ar unrhyw un sydd ag unrhyw wybodaeth amdano i helpu’r heddlu gyda’u hymholiadau, a sicrhau ei fod yn cael ei roi yng ngofal yr heddlu."

Dywedodd y Prif Weinidog ei fod wedi siarad â’i olynydd disgwyliedig Andy Burnham, Llefarydd Tŷ’r Cyffredin Syr Lindsay Hoyle, arweinydd y Ceidwadwyr Kemi Badenoch a Nigel Farage o Reform UK am yr achos.

Dywedodd Mrs Badenoch: "Roedd Ann Widdecombe yn fenyw hwyliog a dewr a oedd yn dweud ei barn, ac roedd hi’n 78 oed - yn fenyw oedrannus.

"Dydw i ddim yn deall sut y gallai rhywun wneud rhywbeth mor erchyll i berson oedrannus. 

"Ymosodiad cas ac erchyll oedd hwn, ac mae fy nghalon yn torri dros ei theulu."

Fe wnaeth yr Ysgrifennydd Cartref, Shabana Mahmood, annog y cyhoedd i beidio â dyfalu am yr achos, gan ddisgrifio amgylchiadau marwolaeth Widdecombe fel rhai “hynod ofidus”.

Dywedodd ei bod wedi siarad â Phrif Gwnstabl Heddlu Dyfnaint a Chernyw a bod y Swyddfa Gartref yn barod i ddarparu unrhyw gymorth oedd ei angen ar yr heddlu.

Gyrfa

Cafodd Anne Widdecombe ei geni ym 1947 ac aeth i'r senedd ym 1987 yn cynrychioli sedd Maidstone yng Nghaint.

Roedd hi wedi gwasanaethu fel cynghorydd yn flaenorol ac wedi gweithio i'r Blaid Geidwadol.

O dan John Major roedd hi'n weinidog cyflogaeth ac yna'n weinidog carchardai.

Daeth i sylw'r cyhoedd hefyd am ei hamser ar Strictly Come Dancing y BBC.

Camodd Widdecombe i lawr o'r senedd yn 2010, wrth i'r Torïaid ddychwelyd i'r llywodraeth.

Yna fe ail-ymunodd â gwleidyddiaeth yn 2019 fel Aelod Senedd Ewrop i blaid Brexit.

Yn etholiad cyffredinol 2019, safodd eto dros San Steffan yn sedd Plymouth Sutton a Devonport dros blaid Nigel Farage, ond gorffennodd yn drydydd ymhell y tu ôl i'r Torïaid a Llafur.