Image
Angen trwsio cerflun Owain Glyndŵr wedi iddo gael ei daro gan lori
Roedd Dydd Gwener y 13eg yn un ychydig yn anlwcus i Owain Glyndŵr wrth i'w gerflun orfod cael ei dynnu o’i blinth yng Nghorwen i gael ei drwsio ar ôl cael ei fwrw gan lori.
Roedd rywfaint o ddifrod i’r cerflun wedi i lori droi oddi ar yr A5 a tharo cyn Dywysog Cymru.
Dywedodd Colin Spofforth a wnaeth gerfio’r cerflun ei fod wedi “gwyro ychydig bach” a bod angen “trwsio hynny”. Roedd yr ysbardun ar un o’i draed hefyd wedi torri i ffwrdd.
Dywedodd Sian Thomas, Prif Weithredwr Cyngor Tref Corwen: “Rydyn ni’n sylweddoli pa mor bwysig yw’r cerflun nid yn unig i Gorwen ond i’r ardal gyfan.
“Mae’n rhaid iddo fod ar ei orau. Fe fydd yn cael ei drwsio rŵan ac fe fydd cystal â newydd ar ôl dod yn ôl. Mae’n cymryd gwyliau bach.”
Fe gymerodd ryw 40 munud i’w dynnu i lawr o’r plinth i ddechrau’r siwrne i ffowndri ym Mhowys i gael ei drwsio.
Fe gafodd y cerflun ei ddadorchuddio yn 2007 gan gostio £125,000.
