Mae Prifysgol Aberystwyth wedi cyhoeddi eu bod am oedi cynllun sydd yn ailddatblygu adeilad yr Hen Goleg "yn dilyn cynnydd sylweddol yng nghyfanswm costau cwblhau'r prosiect."

Fe fydd y gwaith adeiladu presennol yn cael ei oedi er mwyn i'r Brifysgol gynnal "adolygiad cynhwysfawr o'r prosiect."

Yn ôl y ffigyrau cyhoeddus diweddaraf, cynyddodd cost y datblygiad i £53 miliwn.

Mae Newyddion S4C yn cael ar ddeall bod cost cwblhau'r datblygiad bellach yn £24 miliwn yn uwch na'r ffigwr yma.

Dechreuodd y gwaith yn 2022 a'r nod yn wreiddiol oedd ei gwblhau erbyn haf 2024 ar gost o £22 miliwn.

Y bwriad oedd datblygu nifer o elfennau newydd o fewn yr adeilad, gan gynnwys ystafelloedd gwesty, canolfan fenter i fusnesau creadigol a chanolfan wyddoniaeth.

'Cam nesaf'

Mewn datganiad dydd Llun, dywedodd y brifysgol y byddai'r oedi dros dro "yn rhoi cyfle i werthuso'r opsiynau ar gyfer y cam nesaf yng ngoleuni'r amcangyfrifon newydd o gostau uwch."

Bydd yr adolygiad yn ystyried costau yn y dyfodol, cyllid a'r amserlen fwyaf priodol ar gyfer y gwaith sy'n weddill.

"Rydym yn parhau i fod wedi ymrwymo'n gadarn i ganlyniadau hirdymor y prosiect", meddai'r brifysgol.

Ychwanegodd y datganiad: "O ystyried y cynnydd mewn costau rhagamcanedig, mae'n ddoeth mabwysiadu dull ystyriol i sicrhau bod prosiect yr Hen Goleg yn cael ei gwblhau mewn ffordd sy'n cyflawni buddiannau parhaol i'n prifysgol, tref a Chymru.

"Hoffem ddiolch i'n staff, cyllidwyr, partneriaid a rhanddeiliaid am eu cefnogaeth, dealltwriaeth, cydweithrediad ac ymrwymiad parhaus, sydd wedi helpu i yrru'r cynnydd sylweddol hyd yn hyn.

"Byddwn yn parhau i ymgysylltu'n agos â phawb a oedd yn rhan o'r adolygiad drwy gydol y broses ac yn darparu diweddariadau pellach yn ôl yr angen."