Mae dros 30 mlynedd ers Brwydr Fawr Maes Dulyn. 

Yn ystod yr ornest arbennig honno yn 1990, bu actorion C'mon Midffîld a Pobol y Cwm yn wynebu ei gilydd mewn gêm bêl-droed fythgofiadwy. 

Fe wnaeth y gêm ysbrydoli cân gan Sobin a'r Smaeliaid ac mae pobl leol Penygroes yn dal i ddwyn atgofion o'r diwrnod arbennig. 

Ddydd Llun, fe ddychwelodd y frwydr fawr, wrth i CPD Nantlle Vale ddathlu ei ganmlwyddiant a'r ffaith fod yr Eisteddfod yn dychwelyd i Wynedd y flwyddyn nesaf. 

Y tro yma, cafodd y gêm ei chynnal rhwng tîm o 'hoelion wyth' Nantlle Vale a thîm o sêr Cymru, gan gynnwys enwogion o'r byd teledu a cherddoriaeth. 

Cafodd 1,000 o docynnau eu gwerthu ar gyfer y gêm arbennig, gyda'r cyffro'n amlwg ymhlith y gymuned leol. 

Tîm Lejands CPD Nantlle Vale ddaeth i’r brig gyda sgôr terfynol o 6-4.

Roedd y digwyddiad yn codi arian ar gyfer clwb Nantlle Vale yn ogystal ag ar gyfer Eisteddfod Llŷn ac Eifionydd 2023.