Mae Heddlu Gwent yn adyfwio apêl am ddyn aeth ar goll yn Nhrecelyn yn 2012.

Aeth Kyle Vaughan ar goll yn Nhrecelyn ar 30 Rhagfyr 2012 pan aeth allan am y noson ond ni wnaeth ddychwelyd gartref y noson honno.

Byddai Kyle yn dathlu ei benblwydd yn 34 oed ddydd Mercher.

Roedd y car yr oedd yn ei yrru, Peugeot 306 arian, mewn gwrthdrawiad ar yr A467 rhwng Crosskeys a Rhisga ar y diwrnod y gwnaeth ddiflannu.

Fe gafodd ymchwiliad person ar goll ei gyhoeddi cyn troi i fod yn ymchwiliad llofruddiaeth.

Dywedodd y Ditectif Uwcharolygydd Nick Wilkie bod yr ymchwiliad yn parhau i fod yn un helaeth.

"Hyd yma, rydym ni wedi chwilio mewn 40 ardal, cyfweld dros 200 o bobl ac mae bron i 900 o ddatganiadau tystion wedi eu cynnal."

Dywedodd tad Kyle, Alan Vaughan, nad ydy'r teulu "erioed wedi rhoi'r gorau i'r gobaith y byddwn i'n dod o hyd i Kyle."

Mae'r heddlu'n apelio ar unrhyw un sydd â gwybodaeth i gysylltu â nhw gan ddefnyddio'r cyfeirnod 397 30/12/12.