Wedi penderfyniad Boris Johnson i ymddiswyddo fel prif weinidog ddydd Iau, pwy fydd yn ei olynu yn rhif 10?

Mae disgwyl i Mr Johnson wneud cyhoeddiad yn ddiweddarach ddydd Iau am union fanylion ei ymddiswyddiad.

Mae darogan y gallai ymddiswyddo fel arweinydd y Ceidwadwyr yn syth, gan barhau fel prif weinidog tan yr hydref.

Rishi Sunak sy'n arwain y ras i'w olynu ar hyn o bryd yn ôl adroddiadau. Mr Sunak oedd y cyntaf i ymddiswyddo o'r Cabinet dydd Mawrth, cyn i lu o weinidogion ac is-weinidogion ei ddilyn.

Mae Penny Mordaunt a Liz Truss hefyd yn rhai o'r ceffylau blaen i olynu Mr Johnson.

Mrs Mordaunt yw'r Gweinidog dros Bolisi Masnach ac mae hi wedi bod yn feirniadol o bolisi'r llywodraeth yn ddiweddar.

“Mae'n ddinistriol ar fywyd unrhyw un sy'n gwneud y swydd"@DavidTCDavies yn tynnu ei enw allan o’r het o fod yn Brif Weinidog nesaf y DU. pic.twitter.com/bQ3Z0mMD32

— Newyddion S4C (@NewyddionS4C) July 7, 2022

Mae'r Gweinidog Tramor Liz Truss wedi bod yn gefnogol i Boris Johnson yn sgil yr ymddiswyddiadau, ond mae hi yn dychwelyd i Brydain o gynhadledd y G20 yn gynnar ddydd Iau.

Mae'r Telegraph yn deall bod y Canghellor newydd, Nadhim Zahawi wedi bod yn llunio cynllun arweinyddiaeth ers misoedd.

Mae'r Twrnai Cyffredinol Suella Braverman wedi dweud y byddai'n "fraint o'r mwyaf" i arwain y wlad ac mae Is-gadeirydd y Grŵp Adfer Covid, Steve Baker, wedi datgan ei fod ef yn "ystyried yn ddwys" rhoi ei enw yn yr het am swydd yr arweinydd.

Darllenwch ragor yma.