Ffyrdd yn ailagor wedi ‘digwyddiad cemegol’ yn Wrecsam
Mae’r gwasanaethau brys wedi gorffen eu gwaith ar Ystâd Ddiwydiannol Wrecsam, ar ôl ymateb i’r hyn oedd yn cael ei drin fel 'digwyddiad cemegol'.
Mae cylch diogelwch o 500 metr o amgylch Abenbury Way wedi’i godi, ac mae ffyrdd cyfagos wedi ailagor.
Mewn diweddariad am 06:30 fore Sadwrn, dywedodd Gwasanaeth Tân ac Achub Gogledd Cymru fod busnesau a gafodd eu gwacáu fel rhagofal bellach yn gallu dychwelyd i’w safleoedd.
“Nid oes unrhyw risg i’r cyhoedd ehangach,” meddai’r gwasanaeth.
“Fodd bynnag, rydym yn gofyn i bobl barhau i osgoi’r ardal gyfagos tra bo’r gwaith adfer yn parhau.”
Nos Wener, roedd y gwasanaeth wedi cadarnhau bod criwiau’n ymateb i’r hyn oedd yn cael ei drin fel digwyddiad cemegol, gyda chylch diogelwch yn ymestyn hyd at 500 metr o amgylch Ffordd Abenbury.
Roedd ardaloedd o fewn y cylch wedi’u gwagio, ac roedd trigolion cyfagos wedi cael eu cynghori i gadw eu ffenestri a’u drysau ar gau.
Roedd sawl peiriant tân, uned deunyddiau peryglus ac uned diogelu’r amgylchedd yn rhan o’r ymateb, ynghyd â’r heddlu, y gwasanaeth ambiwlans a Chyngor Wrecsam.
Yn ôl diweddariad fore Sadwrn, roedd profion ar y safle wedi galluogi'r penderfyniad i godi’r cylch diogelwch, yn dilyn ymateb gan nifer o asiantaethau drwy gydol y nos.
Mae gweithredwyr y safle bellach wedi cymryd rheolaeth o’r safle ac yn gyfrifol am gael gwared ar y dŵr oedd yn gysylltiedig â’r digwyddiad.
Maen nhw’n gweithio gyda Cyfoeth Naturiol Cymru i helpu i leihau unrhyw effaith bosibl ar yr amgylchedd.
Dywedodd y gwasanaeth y gallai pobl yn yr ardal gyfagos sylwi ar arogl, ond nad oedd hyn yn cael ei ystyried yn risg i ddiogelwch y cyhoedd.