Mae Heddluoedd Cymru wedi apelio ar bobl i beidio heidio i orsafoedd petrol gan achosi ciwiau ar y ffyrdd.

Mewn neges ar y cyfryngau cymdeithasol mae Heddlu Gogledd Cymru wedi annog y cyhoedd i beidio ffurfio ciwiau hir a allai o bosib “achosi risg o niwed i gerddwyr a defnyddwyr eraill y ffordd.”

Maen nhw hefyd wedi gofyn i’r cyhoedd ystyried caniatáu i gerbydau gwasanaeth brys ail-lenwi eu cerbydau gyda thanwydd yn gyntaf fel y gallant barhau i gadw'r gymuned yn ddiogel ac ymateb i argyfyngau.

We are aware of the current fuel concerns and are in touch with fuel stations who have reported there is no disruption to deliveries at most sites

Please do not form queues and cause unnecessary obstructions in roads, potentially risking harm to pedestrians and other road users pic.twitter.com/t55KuYYaEg

— North Wales Police #KeepWalesSafe 🌈 (@NWPolice) September 25, 2021

Rhannodd Heddlu de Cymru neges debyg ddydd Gwener gan alw ar yrwyr i ddilyn canllawiau’r llywodraeth.

“Rydym yn ymwybodol o yrwyr yn ciwio mewn gorsafoedd petrol ledled de Cymru.”

“Mae cadw priffyrdd yn glir yn hanfodol ar gyfer y gwasanaethau brys a swyddogaethau gwasanaethau cyhoeddus eraill ac mae tarfu arnyn nhw’n peri risg i ddiogelwch y cyhoedd.

“Dilynwch ganllawiau’r llywodraeth ynghylch prynu tanwydd, os gwelwch yn dda.”

Daw hyn yn dilyn prinder gyrwyr lorïau sy’n cludo tanwydd i orsafoedd.