Ben Davies: Cymru 'ddim yn bell i ffwrdd' o allu ennill yn erbyn timau gorau Ewrop
Mae capten tîm pêl-droed Cymru, Ben Davies, yn credu nad yw'r tîm yn bell o allu sicrhau canlyniadau yn erbyn gwledydd gorau Ewrop cyn wynebu Portiwgal yn Stadiwm Dinas Caerdydd nos Fawrth.
Wrth siarad cyn gêm olaf Cymru yn eu grŵp yng Nghynghrair y Cenhedloedd, dywedodd Davies fod y chwaraewyr wedi dangos eu bod yn gallu cystadlu ar y lefel uchaf, ond bod angen troi perfformiadau da yn ganlyniadau.
Mae Cymru eisoes yn sicr o orffen ar waelod eu grŵp yng Nghynghrair A, ond bydd ganddyn nhw gyfle i osgoi disgyn i Gynghrair B drwy'r gemau ail gyfle.
Daw'r ornest yn erbyn Portiwgal ar ôl i Gymru golli yn erbyn Norwy ddydd Sadwrn.
"Mae'n her anodd arall i ni yn erbyn tîm da iawn, ond rydyn ni eisiau dangos ein bod ni'n fwy na gallu cystadlu yn erbyn y gwledydd gorau," meddai Davies.
"Dydy'r canlyniadau ddim wedi mynd o'n plaid ni yn y grŵp yma, ond rydyn ni wedi bod yn gystadleuol ym mhob gêm.
"Rydyn ni wedi dangos ein bod ni'n gallu cystadlu ar y lefel yma, a gobeithio y gallwn ni orffen ar nodyn cadarnhaol."
Ar hyn o bryd, Portiwgal sydd ar frig y grŵp gyda 12 pwynt, Denmarc yn ail gyda naw pwynt, Norwy yn drydydd gyda chwech a Chymru ar y gwaelod gyda thri phwynt.
Mae Portiwgal eisoes wedi sicrhau lle yn rownd yr wyth olaf, tra bydd Cymru'n cystadlu yn y gemau ail-gyfle ym mis Mawrth er mwyn ceisio cadw eu lle yng Nghynghrair A.
Wrth gael ei holi am y gwahaniaeth rhwng Cymru a'r timau gorau yng Nghynghrair A, dywedodd Davies fod angen i'r garfan fod bron yn berffaith er mwyn sicrhau canlyniadau.
"Mae'n ymwneud â cheisio gosod ein stamp ni ar gemau a chwarae yn y ffordd rydyn ni eisiau chwarae.
"Dydy hynny ddim yn hawdd o gwbl. Mae'r heriau'n fwy, ac mae hynny'n golygu bod rhaid i chi fod bron yn berffaith drwy'r amser.
"Ond dydw i ddim yn teimlo ein bod ni'n bell i ffwrdd."
"Rwy'n credu y gallai ambell gêm fod wedi mynd o'n plaid ni ar ddiwrnod arall.
"Dyna'r cam nesaf i ni, mae'n debyg, sef troi'r perfformiadau da hynny yn ganlyniadau."
Ychwanegodd ei fod yn falch o ymdrechion y garfan, er gwaethaf yr her o chwarae nifer o gemau mewn cyfnod byr.
"Rydyn ni wedi cystadlu'n dda, ac ar ddiwrnod arall, gydag ychydig o lwc ac ychydig mwy o safon o flaen y gôl, fe allen ni fod mewn sefyllfa wahanol.
"Rwy'n falch o'r garfan yma. Mae'r garfan yn cael ei hymestyn yn eithaf tenau pan mae'n rhaid chwarae pedair gêm mewn 10 neu 12 diwrnod, gan nad oes gennym ni'r fantais o allu dewis carfan enfawr."
Portiwgal heb Ronaldo
Bydd Portiwgal yn wynebu Cymru heb Cristiano Ronaldo, sydd wedi cyhoeddi ei ymddeoliad o bêl-droed rhyngwladol.
Dywedodd Davies, a wynebodd Ronaldo yn Lisbon fis Medi, fod absenoldeb y cyn-seren yn newyddion cadarnhaol i chwaraewyr Cymru, ond rhybuddiodd fod gan Bortiwgal ddigon o dalent arall.
"Maen nhw'n colli chwaraewr o safon fyd-eang, un o'r chwaraewyr gorau y byddech chi'n ei wynebu.
"Ond y gwir amdani yw bod y tîm yn dal yn llawn chwaraewyr o'r safon uchaf, felly rydyn ni'n gwybod y bydd yn her anodd."
Wrth gael ei holi a oedd yn siomedig na fyddai'n cael cyfle arall i wynebu Ronaldo, dywedodd Davies:
"Pan nad ydych chi'n chwarae yn erbyn Cristiano Ronaldo, weithiau gall hynny fod yn well i chi.
"Mae wedi bod yn anrhydedd ac yn fraint rhannu'r cae ag e oherwydd popeth mae wedi'i gyflawni yn y gêm.
"Roedden ni'n ffodus o gael gwneud hynny yn Lisbon, ond fydd dim gormod o chwaraewyr Cymru yn cwyno na fydd e yno."
Bydd Cymru yn erbyn Portiwgal yn fyw ar S4C, S4C Clic, BBC iPlayer am 19:20 nos Fawrth.

