Mae person 16 oed wedi ei arestio ar ôl i gerddwr gael anafiadau all beryglu bywyd yn dilyn gwrthdrawiad yn ymwneud ag e-feic yn Sir Benfro.

Cafodd swyddogion Heddlu Dyfed-Powys eu galw i Bush Hill, ym Mhenfro, tua 14.00 ddydd Llun yn dilyn adroddiadau o wrthdrawiad.

Cafodd y gwasanaeth ambiwlans a’r ambiwlans awyr hefyd eu galw i’r lleoliad, wrth i’r ffordd gael ei chau.

Cafodd y cerddwr ei gludo i’r ysbyty mewn ambiwlans awyr yng nghwmni ei deulu, gydag anafiadau all beryglu bywyd.

Mae plentyn 16 oed wedi ei arestio ar amheuaeth o yrru’n beryglus ac wedi’i gadw yn y ddalfa.

Mae’r ffordd yn parhau ar gau ac mae’r heddlu'n cynghori pobl i osgoi’r ardal.