Mae Nigel Farage wedi awgrymu ei fod yn credu y bydd comisiynydd safonau Senedd San Steffan yn dyfarnu yn ei erbyn ar ddiwedd ymchwiliad i rodd o £5 miliwn a dderbyniodd.

Pan gafodd ei holi ar raglen  Sunday With Laura Kuenssberg dywedodd Mr Farage: “Ydw i’n meddwl y byddai’r sefydliad yn dyfarnu yn fy erbyn i, arweinydd plaid sy’n herio’r drefn? 

“Am gwestiwn i’w ofyn.”

Cafodd arweinydd Reform UK ei gyfweld gan y comisiynydd, Daniel Greenberg, am tua 30 munud ym mis Medi fel rhan o’r ymchwiliad. 

Mae’r ymchwiliad yn ystyried a ddylai fod wedi datgan rhodd o £5m gan y biliwnydd arian ‘crypto’ Christopher Harborne.

O dan reolau Tŷ’r Cyffredin, mae’n rhaid i ASau newydd gofrestru unrhyw roddion gwerth mwy na £300 a gawson nhw yn ystod y 12 mis blaenorol. 

Yr eithriad yw rhoddion na fyddai’n rhesymol i bobl eraill gredu eu bod yn gysylltiedig â’u gweithgareddau gwleidyddol.

Cafodd Mr Farage ei holi am yr ymchwiliad wrth ymddangos ar raglen Sunday With Laura Kuenssberg ar y BBC.

Dywedodd: “O dan reolau San Steffan, os ydw i hyd yn oed yn ateb eich cwestiwn, fe fydda i’n cael llythyr o gerydd gan y comisiynydd safonau.

“Mae’n ffars: Gallwch chi ddweud beth bynnag rydych chi eisiau, gall pobl ysgrifennu beth bynnag maen nhw eisiau, ond does gen i ddim hawl i ymateb.

“Ond i’r diawl â hynny: Ydw, rydw i wedi cael fy nghyfweld am y peth, a wyddoch chi beth?

“Os nad yw llofruddiaeth Ann Widdecombe yn 78 oed yn cyfiawnhau fy mod i’n gallu talu am ba bynnag lefel o ddiogelwch sydd ei hangen arna i am weddill fy mywyd, yna wn i ddim beth sy’n gwneud hynny.”

Mae Mr Harborne yn un o ddau filiwnydd arian crypto a roddodd gyfanswm o £72 miliwn i Reform.