Mae Andy Burnham wedi dweud y bydd gofyn i gyflogwyr ddatgelu faint maen nhw’n barod i’w dalu i weithwyr newydd.

Y disgwyl yw y bydd deddfwriaeth newydd yn cael ei chyflwyno fydd yn ei gwneud yn ofynnol i gyflogwyr gynnwys gwybodaeth am gyflog yn eu hysbysebion swyddi.

Dywedodd y Prif Weinidog: “P’un a ydych chi’n berson ifanc sy’n cychwyn ar eich gyrfa, neu’n rhiant sy’n ceisio cynnal eich teulu, dylech wybod faint mae swydd yn ei dalu cyn gwario eich amser ac ymdrech i wneud cais amdani.

“Dyna pam y byddwn yn ei gwneud yn ofyniad cyfreithiol i bob cyflogwr ddatgelu faint maen nhw’n ei dalu.”

Mae ymchwil gan Sefydliad Siartredig Personél a Datblygu (CIPD) wedi dangos yn flaenorol bod 41% o gyflogwyr bob amser yn cynnwys gwybodaeth am gyflog yn eu hysbysebion swyddi.

Nid oedd tua 27% o gyflogwyr byth yn cynnwys gwybodaeth am gyflog mewn hysbysebion swyddi, yn ôl arolwg yn 2023.

'Agor drysau' i bobl ifanc

Galwodd Mr Burnham hefyd ar “fusnesau i agor mwy o ddrysau a rhoi’r profiad a’r hyder i bobl ifanc gymryd y cam cyntaf hwnnw i fyd gwaith”.

Mae gweinidogion y Blaid Lafur wedi wynebu beirniadaeth am y ffordd y maen nhw wedi ymdrin â’r farchnad swyddi; roedd 13% o bobl ifanc rhwng 16 a 24 oed ddim mewn addysg, cyflogaeth na hyfforddiant (NEET) yn ystod y cyfnod o fis Ebrill i fis Mehefin eleni.

Yn gynharach eleni, rhwng mis Ionawr a mis Mawrth, roedd nifer y bobl ifanc 16-24 oed nad oeddent mewn addysg, cyflogaeth na hyfforddiant yn fwy na miliwn am y tro cyntaf ers 2013.

Mae disgwyl i adolygiad ar bobl ifanc a gwaith, a gynhaliwyd gan gyn-Ysgrifennydd Iechyd y Blaid Lafur, Alan Milburn, ddod i ben yn ddiweddarach y mis hwn.

Yn y farchnad swyddi ehangach, gostyngodd nifer y swyddi gwag tua 21,000 i 691,000 yn ystod y tri mis hyd at fis Medi, yn ôl data gan y Swyddfa Ystadegau Gwladol.

Yn dilyn y Gyllideb yr wythnos diwethaf, honnodd arweinydd y Blaid Geidwadol, Kemi Badenoch, fod “y Blaid Lafur wedi dinistrio swyddi”.

Dywedodd wrth Dŷ’r Cyffredin fod angen “ynni rhatach, marchnadoedd llafur hyblyg a threthi is ar fusnesau - ac nid ydynt yn cael yr un o’r pethau hynny”.

'Rhwystredig'

Mae’r cam i orfodi cyflogwyr i gynnwys gwybodaeth am gyflog yn eu hysbysebion swyddi wedi cael ei groesawu gan Ysgrifennydd Cyffredinol y TUC, Paul Nowak.

Dywedodd: “Mae unrhyw un sydd wedi chwilio am swydd yn gwybod pa mor rhwystredig ydy hi i weld y geiriau ‘cyflog cystadleuol’ yn hytrach na gweld yn union faint y bydd yr unigolyn yn ei ennill.

“Pam y dylid disgwyl i ymgeisydd fynd trwy broses ymgeisio a chyfweld hirfaith heb wybod a fydd y swydd yn talu digon iddo fyw arno?

“Mae’n gwbl briodol bod y Llywodraeth yn cymryd camau llym yn erbyn yr arfer amharchus hwn.

“Dylai cyflogwyr fod yn onest ac yn agored gyda darpar ymgeiswyr, a nodi’n glir faint o gyflog sy’n perthyn i’r swydd.”