Mae Clwb Rygbi Caernarfon wedi ymddeol crys rhif pump ar gyfer gweddill y tymor er cof am chwaraewr ifanc a fu farw.

Bu farw Jack Cameron Wynne Davies, 24 oed, a oedd yn chwarae i Gaernarfon a Rygbi Gogledd Cymru, yn gynharach y mis hwn.

Roedd y dyn ifanc o Lanfairpwll ar Ynys Môn yn chwaraewr rygbi talentog ac yn athro yn Ysgol David Hughes ym Mhorthaethwy.

Mewn cyhoeddiad nos Iau, dywedodd Clwb Rygbi Caernarfon: "Fel teyrnged i Jack, byddwn yn ymddeol crys rhif pump y tîm cyntaf ar gyfer gweddill y tymor.

"Roedd yn bleser gwylio Jack yn chwarae yn y rhif, a teimlwn fel tîm bod y dewis yma yn destament i’w gof."

Cafodd sawl teyrnged ei chyhoeddi i Jack yn dilyn ei farwolaeth.

Mewn teyrnged ar y cyd, dywedodd Clwb Rygbi Caernarfon a Rygbi Gogledd Cymru: "Gyda thristwch mawr y mae Clwb Rygbi Caernarfon ac RGC yn cyhoeddi marwolaeth un o'n chwaraewyr, Jack Cameron Wynne Davies yn 24 oed yn unig.

"Ar ôl ymuno â Chlwb Rygbi Caernarfon yn 12 oed fel athletwr addawol iawn, datblygodd mewn amrywiaeth o dimau a llwyddodd i fod yn rhan o lwybr RGC, cyn symud i lawr i Brifysgol Fetropolitan Caerdydd i astudio Addysg Gorfforol a Chwaraeon am dair blynedd. Dychwelodd i CR Gaernarfon ag RGC, gan ailymuno â'r sgwadiau hŷn yn 2023."

Ychwanegodd y clybiau: "Roedd yn rhan allweddol o deulu RGC a CR Caernarfon ac mae ei farwolaeth yn golled ddinistriol i bawb sy'n gysylltiedig â'r ddau glwb.

"Mae ein meddyliau a'n cydymdeimlad dwysaf gyda'i deulu, ei ffrindiau, ei gyd-chwaraewyr a phawb oedd yn ei adnabod yn ystod yr amser anodd hwn."

Image

Dywedodd Prif Weinidog Cymru Rhun ap Iorwerth: “Newyddion mor drist. Mae’n meddyliau ni gyd heno efo teulu a ffrindiau Jack, holl ddisgyblion a staff Ysgol David Hughes, a’r gymuned rygbi yng ngogledd Cymru.

“Cwsg yn dawel, Jack.”

Image

'Eu haddysgu, eu harwain a'u hysbrydoli'

Roedd Mr Davies yn gweithio fel athro yn Ysgol David Hughes ym Mhorthaethwy.

Dywedodd yr ysgol mewn teyrnged: "Mae hon yn golled enfawr i gymuned Ysgol David Hughes. Bu Jack yn llawer mwy nag aelod o staff; roedd yn ffrind, yn fentor, yn fodel rôl ac yn ffynhonnell gyson o gefnogaeth i gynifer. 

"Bydd ei garedigrwydd, ei ymroddiad, ei gynhesrwydd a'i ymrwymiad diwyro i les a llwyddiant ein dysgwyr yn aros yn y cof. "

Ychwanegodd yr ysgol: "Roedd Jack hefyd yn gyn-ddisgybl yn yr ysgol. Bu ar un adeg yn cerdded yr un coridorau ac yn eistedd yn yr un ystafelloedd dosbarth â'r bobl ifanc y daeth yn ddiweddarach i'w haddysgu, eu harwain a'u hysbrydoli. 

"Roedd ei daith o fod yn ddisgybl i fod yn aelod gwerthfawr o staff yn destun balchder mawr i'n cymuned ysgol gyfan, ac roedd ei gysylltiad â'r ysgol yn un dwfn a pharhaol."

'Wastad yn fodlon ei gymwynas'

Dywedodd Undeb Rygbi Cymru mewn teyrnged: "Mae Undeb Rygbi Cymru yn hynod o drist o glywed am farwolaeth sydyn Jack Davies, chwaraewr RGC.

"Hoffem estyn ein cydymdeimlad dwysaf â theulu Jack, ei ffrindiau, ei gyd-chwaraewyr a phawb yn RGC yn ystod yr adeg hynod o anodd hon."

 

Mae clybiau rygbi Llangefni, Bethesda a Chasnewydd hefyd wedi rhannu teyrngedau, gan gynnig eu cydymdeimladau dwysaf i'w deulu a'i ffrindiau.

 

 

Image

Image