Mae Reform UK wedi cadarnhau mai Helen Jenner yw arweinydd newydd y blaid yng Nghymru.

Bydd Ms Jenner yn olynu Dan Thomas, a wnaeth gamu i lawr fel arweinydd ddydd Mawrth diwethaf ar ôl cael ei arestio ar amheuaeth o ymosod ac ymddwyn mewn modd rheolaethol neu orfodol.

Mae wedi gwadu gwneud unrhyw beth o'i le.

Cafodd Helen Jenner ei henwi’n arweinydd gan Nigel Farage, arweinydd y blaid yn San Steffan, mewn cyfarfod ym Mae Caerdydd ddydd Llun.

Cafodd ei dewis gan ei chyd-aelodau yn y Senedd yn dilyn cyfarfod o aelodau'r blaid.

Cafodd Ms Jenner ei hethol i’r Senedd yn yr etholiadau fis Mai, ac mae hi’n cynrychioli etholaeth Bangor Conwy Môn.

Cafodd ei phenodi'n ddirprwy arweinydd ar y blaid ym mis Mai.

Mae hi hefyd wedi bod yn weinidog cysgodol dros addysg a'r iaith Gymraeg ar ran Reform. 

Cafodd ei phenodi’n arweinydd dros dro ar y blaid yn y Senedd wythnos diwethaf yn dilyn ymddiswyddiad Mr Thomas.

Bydd Ms Jenner bellach yn arwain y grŵp gwrthbleidiol mwyaf yn y Senedd.

Image

Yn ei ddatganiad yn cyhoeddi ei fod yn gadael ei swydd, dywedodd Dan Thomas: "Gyda thristwch mawr, rwyf bellach yn camu i lawr o’r swydd hon am resymau personol."

"Hoffwn bwysleisio nad wyf wedi gwneud dim byd o’i le, ond nid wyf am i’r penawdau sydd i ddod dynnu sylw oddi ar y gwaith gwych y mae ein tîm yn y Senedd yn ei wneud wrth ddal y llywodraeth hon i gyfrif. 

“Byddaf yn parhau i wasanaethu fy etholwyr yng Nghasnewydd Islwyn ac yn cefnogi’n llawn pwy bynnag a ddewisir gan y grŵp fel ei arweinydd nesaf.”

Ychwanegodd ei fod wedi bod yn "anrhydedd fawr" i arwain Reform yng Nghymru. 

Image

Wrth ymateb i'r cyhoeddiad am benodiad Ms Jenner, dywedodd llefarydd ar ran Llafur Cymru: “Ni fydd newid yr arweinydd yn newid y broblem sylfaenol gyda Reform yng Nghymru. 

"Yr wythnos diwethaf, gadawodd un o’u haelodau o'r Senedd y blaid, gan ddweud nad oedd hi (y blaid) ‘o ddifrif dros lywodraethu Cymru’ a’i chyhuddo o drin y Senedd fel cam tuag at uchelgais Nigel Farage o gyrraedd Downing Street. 

"Mae Helen Jenner yn gefnogwr hirsefydlog i Farage, ac mae pobl yn haeddu gwybod beth fydd yn newid o dan ei harweinyddiaeth.

“Dim ond misoedd ar ôl etholiad y Senedd, mae Reform eisoes wedi gweld ei harweinydd yn ymddiswyddo ac un o’i haelodau yn gadael y blaid. Ynghyd â’r ymadawiadau o’i grwpiau cyngor yn Lloegr, mae hynny’n codi cwestiynau difrifol am ei sefydlogrwydd a’i gallu i gyflawni ar gyfer y bobl y mae’n eu cynrychioli.

“Mae pobl ledled Cymru yn wynebu heriau gwirioneddol ac yn haeddu arweinyddiaeth wleidyddol ddifrifol a sefydlog sy’n canolbwyntio ar eu blaenoriaethau.”

Lluniau: PA