Mae Syr Tom Jones yn dweud bod ITV wedi penderfynu na fydd yn parhau fel hyfforddwr ar gyfres The Voice.

Mae’r canwr 86 oed o Drefforest wedi bod yn rhan o’r gyfres ganu boblogaidd ers iddi gael ei lansio yn 2012.

Mae adroddiadau yn y wasg yn awgrymu fod ITV wedi penderfynu na fydd yn parhau fel un o bedwar hyfforddwr yn y gyfres nesaf, gan gynnig rôl wahanol iddo.

Wrth ymateb i’r adroddiadau ar ei gyfrif Instagram ddydd Mawrth, dywedodd Mr Jones:

“I fod yn glir, doeddwn i ddim eisiau gadael The Voice gan fy mod yn caru’r sioe ac yn gwerthfawrogi’r gynulleidfa’n fawr.

“ITV wnaeth y penderfyniad – sbel yn ôl, mae'n debyg, ac fe gefais wybod yn ddiweddar. Y rheswm a roddwyd oedd bod yna heriau ariannol yn ymwneud ag yswiriant.”

Ychwanegodd: “Maen nhw nawr yn dweud yn y wasg eu bod eisiau 'adnewyddu' y sioe, gyda thîm o hyfforddwyr newydd sy'n golygu na fyddai 'na gadair i mi.

“Maen nhw’n cynnig rôl sydd wedi’i gyfyngu’n fawr lle y byddwn i’n ymddangos ond heb fod yn rhan o'r broses o’r dechrau, ac dydw i ddim yn rhy hapus am hynny.

“Felly'r unig beth rwy’n gwybod nawr, yw nad oes byth amser da i ddiswyddo person 86 oed sydd dal yn eithaf da yn ei swydd.”

Dywedodd llefarydd ar ran y rhaglen: “Rydym wedi mwynhau gweithio gyda Syr Tom Jones yn fawr dros y naw mlynedd diwethaf ar gyfres The Voice UK. Er na fydd yn hyfforddwr llawn amser ar y 15fed gyfres, rydym yn parhau i drafod gyda Syr Tom a’i dîm ynglŷn â’i ran yn y gyfres nesaf.”