Mae corff sy’n cynrychioli seiclwyr proffesiynol wedi dweud ei fod yn “gynddeiriog” ar ôl marwolaeth Finlay Tarling mewn ras ym Mhortiwgal.

Bu’r seiclwr 19 oed o Ffos-y-ffin, ger Aberaeron, farw ddydd Gwener ar ôl gwrthdrawiad rhwng ei feic a cherbyd nad oedd yn rhan o ras Volta a Portugal.

Dywedodd Cyclistes Professionnels Associés (CPA): “Nid yw’n iawn bod bywyd athletwr ifanc yn dod i ben fel hyn.

“Rydym yn gynddeiriog nad yw’n bosib, hyd yn oed heddiw, atal damweiniau mor ddifrifol.”

Mae’r cyn-seiclwr proffesiynol o Ffrainc, Jérôme Pineau, hefyd wedi galw diogelwch y ras yn “drychinebus”.

Dywedodd Pineau ei bod yn “wyrth barhaus” nad oedd rhagor o ddigwyddiadau wedi bod yn ystod y ras, gan ychwanegu bod diffyg adnoddau yn effeithio ar ddiogelwch digwyddiadau seiclo.

Wrth ymateb ar ôl y gwrthdrawiad, dywedodd cyfarwyddwr y ras, Ezequiel Mosquera, ei bod yn anodd iawn sicrhau diogelwch ar hyd y llwybr cyfan.

“Mae’n anodd iawn rheoli ‘stadiwm’ sy’n ymestyn am 1,300km,” meddai, gan gyfeirio at lwybr cyfan y ras.

Ychwanegodd fod y trefnwyr wedi ceisio dilyn yr arferion gorau a chynyddu’r trefniadau diogelwch gymaint â phosib.

Manylion newydd

Roedd rhannau o’r ffordd yn cael eu cau dros dro wrth i’r ras fynd heibio.

Roedd y “car ysgubo” (broom wagon), sef y cerbyd oedd yn teithio yng nghefn y ras, yn nodi diwedd y rhan o’r ffordd oedd wedi ei chau.

Dywedodd yr GNR fod gyrrwr y cerbyd arall wedi bod yn aros ar ffordd ochr oedd yn ymuno â llwybr y ras wrth i’r peloton fynd heibio.

Nid oedd swyddog yno gan nad oedd y man wedi cael ei flaenoriaethu yn yr asesiad diogelwch.

Yn ôl yr GNR, fe ofynnodd y gyrrwr i bobl oedd gerllaw a oedd e'n cael symud ymlaen.

Yna fe aeth y cerbyd ar lwybr y ras cyn i’r car ysgubo fynd heibio.

Dywedodd yr GNR nad oedd y cerbyd ar ochr anghywir y ffordd. Roedd yn ei lôn ei hun, ond yn teithio i’r cyfeiriad arall i’r seiclwyr.

Dywedodd yr heddlu fod Finlay wedi cymryd y tro drwy’r lôn chwith, fel sy’n arferol i seiclwyr mewn ras, cyn y gwrthdrawiad.

Mae’r heddlu’n ymchwilio i ba arwyddion oedd yn y fan a’r lle ac a oedd unrhyw rai wedi cael eu symud.

Mae’r ymchwiliad yn parhau, ond nid yw’r heddlu’n disgwyl ar hyn o bryd i’r gyrrwr wynebu cyhuddiad troseddol.

Yn dilyn marwolaeth Finlay, fe wnaeth NSN Development Team dynnu allan o weddill y ras. Cafodd munud o dawelwch ei gynnal cyn y nawfed cymal ddydd Sadwrn.

Teyrnged

Ddydd Sul fe wnaeth tad Finlay Tarling roi teyrnged iddo.

Mewn neges ar y cyfryngau cymdeithasol fore dydd Sul, dywedodd Michael Tarling fod y teulu'n profi "dyddiau anoddaf ein bywydau".

Dywedodd fod y gefnogaeth i'w deulu wedi'r farwolaeth wedi eu cynnal, gan gynnwys "negeseuon, e-byst, erthyglau a galwadau gan ein teulu, ffrindiau, y tîm, a’n cymunedau lleol a chwaraeon."

"Mae clywed faint o gariad ac edmygedd oedd gan bobl tuag at Fin wedi bod o gymorth mawr i ni," meddai.

"Ni allwn ddiolch digon i chi i gyd am y gefnogaeth rydym wedi ei gael. Dydyn ni ddim yn gwybod sut y byddwn yn symud ymlaen o hyn ymlaen, ond byddwn yn darganfod y ffordd gyda chefnogaeth ein teulu, ein ffrindiau a’n cymuned gyfan.

"Er na fydd ein calonnau sydd wedi eu torri byth yn gwella’n llwyr, roedd o nid yn unig yn fab ac yn frawd i ni, ond yn ffrind gorau hefyd. 

"Byddwn yn gweld ei eisiau yn aruthrol - roedd yn berson tyner a chariadus, gyda synnwyr digrifwch sych ac unigryw."