Mae Heddlu Gwent wedi cyhuddo dyn 66 oed o Gasnewydd o lofruddiaeth yn dilyn marwolaeth menyw yn y ddinas.

Mae Albert Williams wedi cael ei gadw yn y ddalfa ac mae disgwyl iddo ymddangos gerbron Ynadon Casnewydd ddydd Llun.

Cafodd swyddogion arfog eu galw yn dilyn adroddiad o ffrwgwd tu allan i eiddo ar Ffordd Sant Vincent yn y ddinas yn oriau mân fore Sadwrn.

Dywedodd yr heddlu fod parafeddygon wedi dod o hyd i'r fenyw, sydd heb ei henwi'n swyddogol, yn farw gerllaw yn ymyl Ffordd Casgwent.

Mae ei theulu wedi cael gwybod.

Dywedodd y Prif Uwcharolygydd John Davies: “Rydym yn deall bod adroddiadau o’r natur hon yn peri pryder mawr a gofid i’n cymunedau.

“Mae dyn, a gafodd ei arestio yn y fan a’r lle, ar hyn o bryd yn y ddalfa gan yr heddlu, ac nid ydym yn chwilio am unrhyw un arall mewn cysylltiad â’r farwolaeth.

“Bydd mwy o bresenoldeb heddlu yn yr ardal, tra bod ein swyddogion yn parhau i gynnal ymholiadau."

Mae'r llu yn annog unrhyw un â gwybodaeth i gysylltu â nhw gan ddefnyddio'r cyfeirnod 2600229981.

Llun: Google